ప్రముఖ సీనియర్ నటుడు గిరిబాబు కన్నుమూయడం పట్ల ఆంధ్రప్రదేశ్ ఉప ముఖ్యమంత్రి పవన్ కల్యాణ్ తీవ్ర విచారం వ్యక్తం చేశారు. ఆయన మరణవార్త తనను ఎంతో కలచివేసిందని పేర్కొన్నారు. ఆయన పవిత్ర ఆత్మకు శాంతి చేకూరాలని భగవంతుణ్ణి ప్రార్థిస్తున్నట్టు తెలిపారు. ఈ మేరకు పవన్ కల్యాణ్ ఒక అధికారిక ప్రకటన విడుదల చేశారు.

తెలుగు సినీ పరిశ్రమలో గిరిబాబు బహుముఖ ప్రజ్ఞాశాలిగా తనకంటూ ప్రత్యేక గుర్తింపు తెచ్చుకున్నారని పవన్ కల్యాణ్ కొనియాడారు. "ప్రతినాయకుడిగా, కథానాయకుడిగా, క్యారెక్టర్ ఆర్టిస్టుగా గిరిబాబు గారు ఎన్నో విభిన్నమైన పాత్రలను పోషించి మెప్పించారు. వెండితెరపై తనదైన శైలిలో చక్కటి హాస్యాన్ని కూడా పండించి ప్రేక్షకులను ఎంతగానో అలరించారు" అని తన ప్రకటనలో గుర్తు చేసుకున్నారు.

కేవలం నటనకే పరిమితం కాకుండా, సినిమా రంగంలోని ఇతర విభాగాల్లోనూ గిరిబాబు రాణించారని డిప్యూటీ సీఎం పేర్కొన్నారు. నిర్మాతగా, దర్శకుడిగా ఆయన విజయవంతమైన చిత్రాలను రూపొందించి పరిశ్రమకు విశేష సేవలందించారని ప్రశంసించారు.

గిరిబాబు మరణం చిత్ర పరిశ్రమతో పాటు ఆయన కుటుంబానికి తీరని లోటని పవన్ కల్యాణ్ పేర్కొన్నారు. ఈ తీరని శోక సమయంలో గిరిబాబు కుమారుడు, ప్రముఖ హాస్య నటుడు రఘుబాబుకు, అలాగే ఇతర కుటుంబ సభ్యులందరికీ భగవంతుడు మనోధైర్యాన్ని ఇవ్వాలని కోరుతూ తన ప్రగాఢ సానుభూతిని తెలియజేశారు.