క్రికెట్ ప్రపంచంలో సరికొత్త ప్రయోగానికి తెరలేచింది. టెస్ట్, వన్డే, టీ20ల తర్వాత క్రికెట్‌లో నాల్గో ఫార్మాట్‌గా భావిస్తున్న 'టెస్ట్ 20' (Test Twenty) శ్రీలంక రాజధాని కొలంబో వేదికగా అధికారికంగా ఆవిష్కృతమైంది. సాంప్రదాయ సుదీర్ఘ ఫార్మాట్‌లోని వ్యూహాత్మక అంశాలను, ఆధునిక టీ20 క్రికెట్ వేగాన్ని సమపాళ్లలో మేళవించి ఈ సరికొత్త పద్ధతికి రూపకల్పన చేశారు. 13 నుంచి 21 ఏళ్ల లోపు వయసున్న యువ క్రికెటర్లలోని నైపుణ్యాలను వెలికితీయడమే లక్ష్యంగా ఈ టోర్నమెంట్‌ను రూపొందించారు.

ఈ ఫార్మాట్‌లో అత్యంత విశేషమైన అంశం 'పారిటీ రూల్' (Parity Rule). దీని ప్రకారం ప్రతి ఫ్రాంచైజీ తరఫున ఒక బాలుర జట్టు (Boys' XI), ఒక బాలికల జట్టు (Girls' XI) బరిలోకి దిగుతాయి. బాలురు బాలురతో, బాలికలు బాలికలతో విడివిడిగానే మ్యాచ్‌లు ఆడతారు. అయితే, ఇరు జట్ల ఆటతీరును, గణాంకాలను కలిపి ఒకే స్కోర్‌బోర్డుపై లెక్కిస్తారు. ఈ ఉమ్మడి స్కోరు ఆధారంగానే మ్యాచ్ ఫలితాన్ని, పాయింట్ల పట్టికలో స్థానాలను నిర్ణయిస్తారు. రెండు జట్ల సమష్టి సహకారం లేకుండా ఏ ఫ్రాంచైజీ కూడా విజేతగా నిలిచే అవకాశం ఉండదు. తద్వారా క్రికెట్‌లో లింగ సమానత్వానికి పెద్దపీట వేసినట్లయింది.

మ్యాచ్ నిర్వహణ తీరు కూడా అత్యంత ఆసక్తికరంగా ఉండనుంది. మొత్తం 80 ఓవర్ల పాటు సాగే ఈ పోటీని నాలుగు ఇన్నింగ్స్‌లుగా (ఒక్కో జట్టుకు రెండు ఇన్నింగ్స్‌లు) విభజించారు. ఒక్కో ఇన్నింగ్స్ 20 ఓవర్ల పాటు కొనసాగుతుంది. ఈ పూర్తి మ్యాచ్ ఒకే రోజులో ముగుస్తుంది. సాంప్రదాయ టెస్ట్ క్రికెట్ తరహాలోనే మొదటి ఇన్నింగ్స్ స్కోర్లను రెండో ఇన్నింగ్స్‌కు కొనసాగిస్తారు. దీంతో రెడ్ బాల్ క్రికెట్‌లో కనిపించే ఫాలో-ఆన్, మ్యాచ్ టై లేదా డ్రా వంటి సమీకరణాలు ఈ ఫార్మాట్‌లోనూ చోటుచేసుకుంటాయి.

కొలంబోలో ఘనంగా నిర్వహించిన ఈ ప్రారంభోత్సవంలో ఆస్ట్రేలియా క్రికెట్ దిగ్గజం మాథ్యూ హేడెన్, శ్రీలంక మాజీ ఆటగాడు రస్సెల్ ఆర్నాల్డ్, ప్రముఖ క్రికెట్ కోచ్ రాజ్‌కుమార్ శర్మ తదితర ప్రముఖులు పాల్గొన్నారు. నవంబర్ 14 నుంచి నవంబర్ 29 వరకు ఈ తొలి సీజన్ పోటీలు జరగనున్నాయి. ఇందులో సౌత్ ఆసియా, ఆస్ట్రలేసియా, యూరప్, సబ్-సహారన్ ఆఫ్రికా పేర్లతో నాలుగు ఖండాలకు ప్రాతినిధ్యం వహించే జట్లు టైటిల్ కోసం తలపడనున్నాయి. యువ ప్రతిభావంతులకు అంతర్జాతీయ స్థాయి గుర్తింపు తెచ్చేందుకు ఈ వేదిక ఎంతో ఉపయోగపడుతుందని క్రీడా నిపుణులు భావిస్తున్నారు.