ఇండియన్ ప్రీమియర్ లీగ్ (ఐపీఎల్) రిటెన్షన్ గడువుకు ముందు ఒక కీలకమైన మార్పు చోటుచేసుకుంది. సీనియర్ ఫాస్ట్ బౌలర్ హర్షల్ పటేల్‌ సన్‌రైజర్స్ హైదరాబాద్ (ఎస్‌ఆర్‌హెచ్) నుంచి గుజరాత్ టైటాన్స్ (జీటీ)కు బదిలీ అవుతున్నాడు పూర్తి నగదు రూపంలో (ఆల్-క్యాష్ ట్రేడ్) కుదిరిన ఈ ఒప్పందం ద్వారా అతడు గుజరాత్ టైటాన్స్ లోకి అడుగుపెడుతున్నాడు.

ఈ ఒప్పందంలో భాగంగా గుజరాత్ టైటాన్స్ రూ.4 కోట్లు చెల్లించనుంది. 2025 మెగా వేలంలో సన్‌రైజర్స్ హైదరాబాద్ రూ.8 కోట్లు వెచ్చించి హర్షల్‌ను సొంతం చేసుకోగా, ఇప్పుడు అందులో సరిగ్గా సగం ధరకే గుజరాత్ టైటాన్స్ అతడిని ట్రేడ్ చేసుకున్నట్టు తెలుస్తోంది. 35 ఏళ్ల ఈ వెటరన్ పేసర్‌కు ఐపీఎల్‌లో ఇది ఐదో జట్టు కావడం విశేషం. గతంలో అతడు రాయల్ ఛాలెంజర్స్ బెంగళూరు, ఢిల్లీ క్యాపిటల్స్, పంజాబ్ కింగ్స్, సన్‌రైజర్స్ హైదరాబాద్ జట్లకు ప్రాతినిధ్యం వహించాడు.

అహ్మదాబాద్‌లో జన్మించిన హర్షల్ పటేల్‌కు గుజరాత్‌తో బలమైన అనుబంధం ఉంది. దేశవాళీ క్రికెట్‌లోనూ అతడు గుజరాత్ జట్టు తరఫునే ఆడుతుండటంతో ఈ ట్రేడ్ అతడికి నిజమైన సొంతగూటి చేరికగా మారింది. వాస్తవానికి 2024, 2025 వేలంపాటల్లో హర్షల్ పటేల్‌ను దక్కించుకోవడానికి గుజరాత్ టైటాన్స్ తీవ్రంగా ప్రయత్నించింది. ఎట్టకేలకు ఈ ట్రేడ్ ద్వారా అతడిని తమ జట్టులోకి చేర్చుకోవడంలో సఫలమైంది.

2025 సీజన్‌లో సన్‌రైజర్స్ తరఫున ఆడిన హర్షల్ 16 వికెట్లు తీసి మంచి ప్రదర్శన కనబరిచాడు. అయితే 2026 సీజన్‌లో అతడికి అవకాశాలు గణనీయంగా తగ్గాయి. ఆ సీజన్‌లో కేవలం 5 మ్యాచ్‌ల్లో మాత్రమే ఆడిన అతడు ఒక్క వికెట్ కూడా తీయలేకపోయాడు. ఆ సమయంలో హైదరాబాద్ జట్టు ప్రఫుల్ హింగే, సాకిబ్ హుస్సేన్ లాంటి అన్‌క్యాప్డ్ భారత పేసర్లకు ఎక్కువ ప్రాధాన్యతనిచ్చింది. ప్రస్తుతం గుజరాత్ టైటాన్స్‌లో కగిసో రబడా, మహమ్మద్ సిరాజ్, ప్రసిద్ధ్ కృష్ణ, జేసన్ హోల్డర్ వంటి బలమైన పేస్ విభాగం ఉంది. ఇప్పుడు వారితో హర్షల్ పటేల్ జతకట్టనున్నాడు. డెత్ ఓవర్లలో హర్షల్ నైపుణ్యం, అపార అనుభవం గుజరాత్ టైటాన్స్ బౌలింగ్ లైనప్‌కు మరింత బలాన్ని చేకూర్చనున్నాయి.