ఫుట్‌బాల్‌ మైదానంలో జరిగిన ప్రమాదకర ఘటన ఓ ఆటగాడి ప్రాణం తీసింది. ఈ ఘటనకు కారణమైన గోల్‌కీపర్‌పై స్పెయిన్‌ ఫుట్‌బాల్‌ సమాఖ్య కఠిన చర్యలు తీసుకుంది. ఎఫ్‌సీ అండోరా గోల్‌కీపర్‌ జీసస్‌ ఓవోనోపై 12 మ్యాచ్‌ల నిషేధం విధించింది. గోల్ కీపర్ జీసస్ ఓవోనోను ఢీకొన్న ఘటనలో  టెనెరిఫే జట్టు ఫార్వర్డ్‌ జీసస్‌ డి మిగ్వెల్‌ తీవ్రంగా గాయపడి మరణించాడు.

నవంబర్‌ 2న స్పెయిన్‌ రెండో డివిజన్‌ లీగ్‌లో అండోరా, టెనెరిఫే జట్ల మధ్య మ్యాచ్‌ జరిగింది. ఆట చివరి దశలో డి మిగ్వెల్‌ను ఓవోనో బలంగా ఢీకొట్టడంతో రిఫరీ అతడికి రెడ్‌కార్డు చూపించాడు. మరుసటి రోజు 30 ఏళ్ల డి మిగ్వెల్‌ మరణించాడు.

రిఫరీ నివేదికను పరిశీలించిన క్రమశిక్షణ కమిటీ.. ప్రత్యర్థి ఛాతీపై కాలితో అతిగా బల ప్రయోగం చేస్తూ కొట్టినందుకే ఓవోనోకు రెడ్‌కార్డు ఇచ్చినట్లు పేర్కొంది. ఘటన తీవ్రత, దాని విషాదకర పరిణామాలను దృష్టిలో ఉంచుకుని గరిష్ఠంగా 12 మ్యాచ్‌ల నిషేధం విధిస్తున్నట్లు తెలిపింది.

ఈ ఘటనతో నిలిచిపోయిన మ్యాచ్‌ను తిరిగి నిర్వహించకూడదని కూడా సమాఖ్య నిర్ణయించింది. మ్యాచ్‌ ఆగిపోయే సమయానికి ఇరు జట్లు 2-2తో సమంగా ఉన్నాయి. మిగిలిన ఆటను కొనసాగించకుండా అదే స్కోరును ఖరారు చేయడం విషాద ఘటన నేపథ్యంలో గౌరవప్రదమైన నిర్ణయమని సమాఖ్య పేర్కొంది.

ఘటన తర్వాతి రోజులు తన జీవితంలో అత్యంత కఠినమైనవని, డి మిగ్వెల్‌ మరణం తనకు తీవ్ర వేదన కలిగించిందని ఓవోనో స్పందించాడు. ప్రస్తుతం అతడు కుటుంబ సభ్యులతో ఉంటున్నట్లు అండోరా కోచ్‌ కార్లెస్‌ మాన్సో తెలిపారు. మళ్లీ ఆటలోకి రావాలా? ఎప్పుడు రావాలి? అన్నది ఓవోనోనే నిర్ణయించుకుంటాడని, క్లబ్‌ నుంచి ఎలాంటి ఒత్తిడి ఉండదని స్పష్టం చేశారు. అతడికి అన్ని విధాలా అండగా ఉంటామని చెప్పారు.