నిత్యావసర వస్తువుల ధరల పెరుగుదలతో ఇబ్బందులు పడుతున్న పేదలకు ఉపశమనం కలిగించేలా ఆంధ్రప్రదేశ్ ప్రభుత్వం కీలక నిర్ణయం తీసుకుంది. రానున్న క్రిస్మస్, సంక్రాంతి పండుగలను పురస్కరించుకుని, డిసెంబర్ నెల నుంచి మూడు నెలల పాటు రేషన్ కార్డుదారులకు రాయితీ ధరలకే నిత్యావసర సరుకులను చౌక ధరల దుకాణాల ద్వారా పంపిణీ చేయాలని నిశ్చయించింది.

ఈ పథకంలో భాగంగా కిలో కందిపప్పును రూ.100, లీటరు పామాయిల్‌ను రూ.125, కిలో గోధుమ పిండిని రూ.25 చొప్పున పంపిణీ చేయనున్నారు. ప్రస్తుతం బహిరంగ మార్కెట్‌లో కందిపప్పు ధర కిలోకు రూ.170 నుంచి రూ.200 వరకు ఉండటంతో, ప్రభుత్వ నిర్ణయం పేద కుటుంబాలకు ఆర్థికంగా పెద్ద ఊరటనివ్వనుంది.

ఈ పథకం అమలుకు ప్రభుత్వం నెలకు రూ.100.20 కోట్లు, మూడు నెలల కాలానికి మొత్తంగా రూ.300.60 కోట్ల మేర సబ్సిడీ భారాన్ని భరించనుంది. ఈ మేరకు పౌరసరఫరాల శాఖ మంగళవారం ఉత్తర్వులు జారీ చేసింది. కందిపప్పు సరఫరా నిమిత్తం రాష్ట్ర ప్రభుత్వం కేంద్రాన్ని 1.20 లక్షల టన్నుల నిల్వలను కోరగా, ప్రస్తుతం 40,338 టన్నుల ముడి కందులను కేంద్రం కేటాయించింది.

కేంద్రం కేటాయించిన ముడి కందులను సేకరించి, మిల్లింగ్ ప్రక్రియ పూర్తి చేసి పంపిణీకి సిద్ధం చేయాలని, అలాగే పామాయిల్ సేకరణకు తక్షణ చర్యలు చేపట్టాలని పౌరసరఫరాల శాఖ అధికారులను ప్రభుత్వం ఆదేశించింది. ఈ పథకాన్ని మూడు నెలల అనంతరం కూడా కొనసాగించాలంటే ప్రభుత్వ ముందస్తు అనుమతి తప్పనిసరని ఉత్తర్వుల్లో స్పష్టం చేసింది.