ఇరాన్ విషయంలో అమెరికా అధ్యక్షుడు డొనాల్డ్ ట్రంప్ కీలక నిర్ణయం తీసుకున్నారు. ఇరాన్‌పై కొత్తగా సైనిక దాడులకు దిగకుండా, అదే సమయంలో ఆ దేశంతో తమకు అనుకూలంగా లేని శాంతి ఒప్పందం చేసుకోకుండా మధ్యే మార్గాన్ని ఎంచుకున్నారు. ఇరాన్‌పై ఆర్థిక ఒత్తిడిని మరింత తీవ్రతరం చేయడమే తమ కొత్త వ్యూహమని స్పష్టం చేశారు.

జీ7 విదేశాంగ మంత్రుల సమావేశంలో అమెరికా విదేశాంగ మంత్రి మార్కో రూబియో ఈ వ్యూహాన్ని బయటపెట్టారు. “అధ్యక్షుడి ముందు యుద్ధం లేదా బలహీనమైన ఒప్పందం అనే రెండే మార్గాలు లేవు. మేము అర్థంలేని ఒప్పందం చేసుకోబోం. ప్రస్తుతం చేస్తున్నదాన్నే కొనసాగించడం మూడో మార్గం” అని ఆయన స్పష్టం చేశారు. ఈ విధానం ద్వారా ఇరాన్ ఆర్థిక వ్యవస్థను పూర్తిగా బలహీనపరిచి, ప్రపంచవ్యాప్తంగా ఉన్న సాయుధ గ్రూపులకు నిధులు అందకుండా చేయాలని అమెరికా లక్ష్యంగా పెట్టుకుంది. ఆ దేశ సైనిక సామర్థ్యాన్ని దెబ్బతీయడం కూడా దీని వెనుక ఉన్న ఉద్దేశం.

సోమవారం ఖతార్ ప్రధానితో భేటీ అనంతరం ట్రంప్ మాట్లాడుతూ.. ఇరాన్‌పై సైనిక దాడికి అవకాశం చాలా తక్కువని అన్నారు. ప్రస్తుత ఆర్థిక ఒత్తిడి, నావికా దిగ్బంధనం కొనసాగుతాయని తెలిపారు. దీంతో పాటు ఇరాన్‌కు ఆయుధాలు, సాంకేతికత అందకుండా భూ మార్గాలను మూసివేయడానికి ‘ఐరన్ గేట్’ అనే కొత్త ఆపరేషన్‌ను కూడా చేపట్టనున్నట్లు ఆయన వెల్లడించారు.

ట్రంప్ తీసుకున్న ఈ నిర్ణయానికి విదేశాంగ మంత్రి రూబియోతో పాటు ట్రెజరీ సెక్రటరీ స్కాట్ బెసెంట్, సీఐఏ డైరెక్టర్ జాన్ రాట్‌క్లిఫ్, ట్రంప్ సలహాదారు జారెడ్ కుష్నర్ వంటి కీలక వ్యక్తులు మద్దతు తెలిపారు. అయితే, అమెరికా అనుసరిస్తున్న ఈ కఠిన వైఖరిపై టర్కీ, ఇరాక్, పాకిస్థాన్ వంటి కొన్ని మిత్రదేశాలు ఆందోళన వ్యక్తం చేస్తున్నాయి. శాంతి చర్చల దిశగా వెళ్లకుండా, ఒత్తిడిని పొడిగించడం సరికాదని ఆ దేశాలు అభిప్రాయపడుతున్నాయి. ప్రస్తుతం అమెరికా నావికా దిగ్బంధనాన్ని కొనసాగిస్తుండగా, ఇరాన్ మాత్రం తమ షరతుల ప్రకారమే ఒప్పందం జరగాలని పట్టుబడుతోంది. అయితే, ఇరాన్ ప్రతిపాదనలు ఆమోదయోగ్యంగా లేవని వాషింగ్టన్ తేల్చిచెబుతోంది. దీంతో ఇరు దేశాల మధ్య ప్రతిష్టంభన కొనసాగుతోంది.