మురసు తుపాను కారణంగా ఆంధ్రప్రదేశ్‌లో రోడ్లు, భవనాల (ఆర్ అండ్ బీ) శాఖ పరిధిలోని రహదారులకు భారీగా నష్టం వాటిల్లింది. రాష్ట్రవ్యాప్తంగా 10 జిల్లాల్లో దాదాపు 1,302 కిలోమీటర్ల మేర రోడ్లు దెబ్బతిన్నాయని, వీటి పునరుద్ధరణకు రూ.870.90 కోట్లు అవసరమని రాష్ట్ర రోడ్లు, భవనాల శాఖ మంత్రి బీసీ జనార్దన్ రెడ్డి వెల్లడించారు.

‘‘రహదారుల తాత్కాలిక పునరుద్ధరణ పనులకు రూ.98.70 కోట్లు, శాశ్వత పనులకు రూ.772.22 కోట్లు అవసరం. మొత్తం పనులకు రూ.870.90 కోట్ల వ్యయం అవుతుంది’’ అని వివరించారు. క్షేత్రస్థాయి అధికారుల నుంచి అందిన ప్రాథమిక నివేదికల ఆధారంగా నష్ట తీవ్రతను లెక్కించినట్లు చెప్పారు.

తుపాను ప్రభావంతో రాష్ట్రవ్యాప్తంగా 158 చోట్ల రోడ్లు కోతకు గురికాగా, యుద్ధప్రాతిపదికన చర్యలు చేపట్టి 141 చోట్ల మరమ్మతులు పూర్తి చేసినట్లు మంత్రి తెలిపారు. మరో 31 ప్రాంతాల్లో రోడ్లు కొట్టుకుపోగా, ఇప్పటికే 30 చోట్ల రాకపోకలను పునరుద్ధరించామన్నారు. 207 చోట్ల నేలకొరిగిన చెట్లను యుద్ధప్రాతిపదికన తొలగించి ట్రాఫిక్ ఇబ్బందులు లేకుండా చూశామన్నారు.

జిల్లాల వారీగా చూస్తే బాపట్లలో అత్యధికంగా 332 కిలోమీటర్లు, గుంటూరులో 266 కిలోమీటర్లు, ఎన్టీఆర్ జిల్లాలో 202 కిలోమీటర్ల మేర రోడ్లు పాడయ్యాయి. పశ్చిమ గోదావరి (122 కి.మీ), పల్నాడు (93 కి.మీ), ఏలూరు (75 కి.మీ), తూర్పు గోదావరి (68 కి.మీ), నెల్లూరు (66 కి.మీ), కృష్ణా (59 కి.మీ), ప్రకాశం (17 కి.మీ) జిల్లాల్లోనూ రహదారులు దెబ్బతిన్నాయి. వరద నీరు తగ్గుముఖం పట్టిన వెంటనే శాశ్వత పునరుద్ధరణ పనులను వేగవంతం చేస్తామని మంత్రి స్పష్టం చేశారు.