ఏపీలో కనిపిస్తున్న మార్పులు, అభివృద్ధి అసాధారణం.. చంద్రబాబు నాయకత్వంపై ‘టైమ్’ ప్రత్యేక ప్రశంసలు

ఆంధ్రప్రదేశ్ అభివృద్ధి ప్రస్థానం, పారిశ్రామిక పురోగతిని అంతర్జాతీయ వేదికపై చాటిచెప్పేలా విశాఖపట్నంలో ‘టైమ్ ఇంపాక్ట్ డిన్నర్’ కార్యక్రమం ఘనంగా నిర్వహించారు. సీఐఐ పార్టనర్‌షిప్ సమ్మిట్ సందర్భంగా స్థానిక ది పార్క్ హోటల్‌లో ఏర్పాటు చేసిన ఈ ప్రత్యేక కార్యక్రమంలో ముఖ్యమంత్రి చంద్రబాబు, ‘టైమ్’ ఇంటర్నేషనల్ మేనేజింగ్ డైరెక్టర్ డామియన్ డగ్లస్‌తో ముఖాముఖి చర్చలో పాల్గొన్నారు. సుమారు 100 మంది ప్రముఖ పారిశ్రామికవేత్తలు, వ్యాపార రంగ నిపుణులు, ప్రభుత్వ ఉన్నతాధికారులు ఈ సమావేశానికి హాజరయ్యారు.

రాష్ట్రంలో పెట్టుబడులకు కల్పిస్తున్న అనుకూల వాతావరణం, పరిశ్రమల ఏర్పాటులో వేగం తదితర అంశాలను ముఖ్యమంత్రి చంద్రబాబు ఈ సందర్భంగా వివరించారు. ఆంధ్రప్రదేశ్ ప్రభుత్వం కేవలం ‘ఈజ్ ఆఫ్ డూయింగ్ బిజినెస్’కే పరిమితం కాకుండా, మరింత వేగంగా నిర్ణయాలు తీసుకుంటూ ‘స్పీడ్ ఆఫ్ డూయింగ్ బిజినెస్’ దిశగా అడుగులు వేస్తోందని స్పష్టం చేశారు. ప్రాజెక్టులు వేగంగా గ్రౌండింగ్ కావడానికే ప్రభుత్వం అత్యధిక ప్రాధాన్యత ఇస్తోందని తెలిపారు. దీనికి ఉదాహరణగా గూగుల్ ప్రాజెక్టును ఆయన ప్రస్తావించారు. 

ఏపీలో గూగుల్ ఏఐ హబ్ ఏర్పాటుపై 2025 అక్టోబర్‌లో ప్రకటన రాగా, ప్రభుత్వం చూపిన చొరవతో కేవలం ఆరు నెలల వ్యవధిలోనే 2026 ఏప్రిల్‌లో శంకుస్థాపన పూర్తయిందని వివరించారు. రాష్ట్రంలో జరుగుతున్న మౌలిక సదుపాయాల అభివృద్ధి, పెట్టుబడుల ప్రవాహాన్ని అంతర్జాతీయ వేదికలపై విస్తృతంగా ప్రచారం చేయాలని ‘టైమ్’ ప్రతినిధులకు ముఖ్యమంత్రి విజ్ఞప్తి చేశారు. వచ్చే ఏడాది మరోసారి ఏపీకి వచ్చి రాష్ట్ర పురోగతిని స్వయంగా పరిశీలించాలని ఆహ్వానించారు.

‘టైమ్’ ఇంటర్నేషనల్ మేనేజింగ్ డైరెక్టర్ డామియన్ డగ్లస్ మాట్లాడుతూ ముఖ్యమంత్రి చంద్రబాబు నాయకత్వ పటిమ, రాష్ట్రంలో వేగంగా జరుగుతున్న అభివృద్ధి తీరుపై ప్రశంసలు కురిపించారు. ఏపీలో కనిపిస్తున్న మార్పులు, అభివృద్ధి అసాధారణమైనవని పేర్కొన్నారు. రాష్ట్రం సాధిస్తున్న విజయాలు సీఎం అద్భుతమైన దార్శనికతకు నిదర్శనమని కొనియాడారు. ఆంధ్రప్రదేశ్ ప్రగతి ప్రస్థానాన్ని, ఇక్కడి విజయవంతమైన అభివృద్ధి నమూనాను అంతర్జాతీయ స్థాయికి తీసుకెళ్లి ప్రపంచానికి పరిచయం చేస్తామని డగ్లస్ భరోసా ఇచ్చారు.

అనంతరం ‘బిల్డ్ ద నెక్స్ట్ చాప్టర్ ఆఫ్ గ్రోత్’ అనే అంశంపై ఉన్నత స్థాయి ప్యానెల్ చర్చ జరిగింది. వరాహ క్లైమేట్‌ఏజీ ప్రతినిధి మధుర్ జైన్, పబ్లిసిస్ గ్రూప్ సీఈఓ అనుప్రియ ఆచార్య, ఇసుజు మోటార్స్ ఇండియా ప్రెసిడెంట్ అండ్ ఎండీ రాజేష్ మిట్టల్, ఆసియా అభివృద్ధి బ్యాంకు సౌత్ ఆసియా విభాగం ఇండియా రెసిడెంట్ మిషన్ కంట్రీ డైరెక్టర్ మియో ఓకా ఇందులో పాల్గొన్నారు. టైమ్100 నెక్ట్స్ ఇండియా సీనియర్ ప్రొడ్యూసర్, ప్రాజెక్ట్ డైరెక్టర్ గాయత్రి రంగాచారి షా మోడరేటర్‌గా వ్యవహరించారు. ప్రపంచ ఆర్థిక వ్యవస్థకు దోహదపడే భాగస్వామ్యాలు, భవిష్యత్ అభివృద్ధి అవకాశాలు, సుస్థిర పారిశ్రామిక వృద్ధిపై నిపుణులు తమ అభిప్రాయాలను వెల్లడించారు.