విశాఖ‌ప‌ట్నంలో జ‌రుగుతున్న‌ సీఐఐ సదస్సులో ఏపీ సీఎం చంద్రబాబు నాయుడు చేసిన వ్యాఖ్యలు సోషల్ మీడియాలో తీవ్ర చర్చకు దారితీశాయి. అంతరిక్షం నుంచి రాత్రిపూట కూడా సూర్యరశ్మిని పొందే టెక్నాలజీ గురించి ఆయన ప్రస్తావించగా, దీనిపై పలువురు నెటిజన్లు ట్రోలింగ్ మొదలుపెట్టారు. 

రాత్రి సమయంలో సూర్యరశ్మి ఎలా సాధ్యమంటూ వ్యంగ్యాస్త్రాలు సంధించారు. ఈ నేపథ్యంలో ట్రోలింగ్‌కు ఫుల్‌స్టాప్ పెట్టేందుకు ప్రభుత్వం రంగంలోకి దిగింది. చంద్రబాబు చెప్పిన టెక్నాలజీ కల్పితం కాదని, దానిపై ఇప్పటికే అంతర్జాతీయ స్థాయిలో ప్రయోగాలు జరుగుతున్నాయని ఫ్యాక్ట్ చెక్ ద్వారా వివరణ ఇచ్చింది.

అసలేంటీ టెక్నాలజీ?
ప్రభుత్వం విడుదల చేసిన వివరాల ప్రకారం, అమెరికాలోని కాలిఫోర్నియాకు చెందిన 'రిఫ్లెక్ట్ ఆర్బిటల్' అనే స్పేస్ స్టార్టప్ సంస్థ ఈ సాంకేతికతపై పనిచేస్తోంది. భూకక్ష్యలో భారీ అద్దాలు (Reflectors) కలిగిన ఉపగ్రహాలను ప్రవేశపెట్టి, వాటి ద్వారా సూర్యకాంతిని రాత్రి సమయంలో భూమిపై ఎంపిక చేసిన ప్రాంతాలకు పరావర్తనం చెందించడం (reflect) ఈ ప్రాజెక్టు ముఖ్య ఉద్దేశం. 

విశేషమేమిటంటే.. ఈ ఉపగ్రహాలను నింగిలోకి పంపేందుకు 'రిఫ్లెక్ట్ ఆర్బిటల్' సంస్థ, మన దేశానికి చెందిన ప్రముఖ స్పేస్-టెక్ కంపెనీ 'స్కైరూట్ ఏరోస్పేస్'తో ఒప్పందం కుదుర్చుకుంది. స్కైరూట్ అభివృద్ధి చేసిన 'విక్రమ్' సిరీస్ రాకెట్ల ద్వారా ఈ ప్రయోగాలు జరగనున్నాయి.

ప్రయోజనాలు ఏంటి?
ఈ టెక్నాలజీ వాస్తవరూపం దాల్చితే అనేక ప్రయోజనాలు ఉంటాయని ప్రభుత్వం పేర్కొంది. ముఖ్యంగా, పునరుత్పాదక ఇంధన రంగంలో ఇది విప్లవాత్మక మార్పులు తేగలదు.

నిరంతర సౌర విద్యుత్: సాధారణంగా పగటిపూట మాత్రమే పనిచేసే సోలార్ ప్లాంట్లు, ఈ టెక్నాలజీతో రాత్రిపూట కూడా విద్యుత్‌ను ఉత్పత్తి చేయవచ్చు. సూర్యాస్తమయం తర్వాత, తెల్లవారుజామున ఉండే అధిక విద్యుత్ డిమాండ్‌ను తక్కువ ఖర్చుతో అధిగమించవచ్చు.
బ్యాటరీ ఖర్చుల ఆదా: రాత్రిపూట విద్యుత్ అవసరాల కోసం ఖరీదైన బ్యాటరీ స్టోరేజ్ వ్యవస్థలపై ఆధారపడటం గణనీయంగా తగ్గుతుంది.
విపత్తుల సమయంలో సహాయం: తుఫాన్లు, భూకంపాలు, వరదల వంటి ప్రకృతి వైపరీత్యాలు సంభవించినప్పుడు విద్యుత్ సరఫరా నిలిచిపోయిన ప్రాంతాల్లో, రాత్రివేళ సహాయక చర్యలకు అవసరమైన వెలుతురును అందించవచ్చు.
వ్యవసాయం, నిర్మాణం: చలి ప్రదేశాలు, పగటి సమయం తక్కువగా ఉండే ప్రాంతాల్లో పంటల ఎదుగుదలకు, నిరంతరాయంగా సాగే భారీ నిర్మాణ ప్రాజెక్టులకు ఈ సాంకేతికత ఎంతగానో ఉపయోగపడుతుంది.

భవిష్యత్తు సాంకేతికత గురించి సీఎం చంద్రబాబు దార్శనికతతో మాట్లాడితే, దానిపై కనీస అవగాహన లేకుండా కొందరు తప్పుడు ప్రచారం చేస్తున్నారని ప్రభుత్వం తన వివరణలో స్పష్టం చేసింది.