వైఎస్ కుటుంబంలో వివాదం మరింత ముదురుతోంది. బెంగళూరులో జగన్ నివాసం ఉంటున్న యలహంక ప్యాలెస్ లోకి వైఎస్ షర్మిలకు ప్రవేశం లేదంటూ కోర్టు సంచలన తీర్పు ఇచ్చిన నేపథ్యంలో, నేడు కీలక పరిణామం చోటుచేసుకుంది. షర్మిల ఈ సాయంత్రం బెంగళూరు చేరుకున్నారు. అయితే, కోర్టు ఉత్తర్వుల నేపథ్యంలో బెంగళూరు పోలీసులు అప్రమత్తమయ్యారు. షర్మిలతో పాటు ఆమె కుటుంబ సభ్యులు, అనుచరులు ఎవరూ యలహంక ప్యాలెస్‌లోకి ప్రవేశించకుండా అడ్డుకునేందుకు వారు సిద్ధమయ్యారు. ప్యాలెస్‌లోకి వారు ప్రవేశించకుండా న్యాయస్థానం మధ్యంతర ఉత్తర్వులు జారీ చేయడంతో, ఆ ఆదేశాల మేరకు పోలీసులు ఈ చర్యలు చేపట్టారు. ఈ కేసుకు సంబంధించిన తదుపరి విచారణను కోర్టు డిసెంబర్ 19కి వాయిదా వేసింది.

యలహంక ప్యాలెస్‌ వివాదంపై సిలికాన్ బిల్డర్స్ ప్రైవేట్ లిమిటెడ్ తరఫున భీమిశెట్టి రమేష్‌బాబు కోర్టును ఆశ్రయించి పిటిషన్ దాఖలు చేశారు. వైఎస్ భారతి 2017 ఫిబ్రవరి 16 వరకు ఈ సిలికాన్ బిల్డర్స్ సంస్థలో డైరెక్టర్‌గా వ్యవహరించారని, ప్రస్తుతం రమేశ్ బాబుతో కలిసి ఆమె 'భగవత్ సన్నిధి ఎస్టేట్స్ ఎల్‌ఎల్‌పీ'లో డైరెక్టర్‌గా కొనసాగుతున్నారని పిటిషన్‌లో పేర్కొన్నారు.

ఈ పిటిషన్‌పై విచారణ సందర్భంగా పిటిషనర్ తరఫు న్యాయవాది సుధీర్ మేడమ్మయ్య వాదనలు వినిపించారు. వైఎస్ భారతి తల్లి ఇ.సి. సుగుణమ్మ 2007 మార్చి 1న 20 ఏళ్ల కాలపరిమితితో (2027 ఫిబ్రవరి 28 వరకు) ఈ ప్యాలెస్‌ను తమ సంస్థకు లీజుకు ఇచ్చారని కోర్టుకు తెలిపారు. ఈ ప్రాంగణంలో పండ్లతోటలు, గెస్ట్‌హౌస్‌లు, ఇతర నిర్మాణాల అభివృద్ధి కోసం సంస్థ భారీగా ఖర్చు చేసిందని వివరించారు. అనంతరం 2026 ఆగస్టు 27న సుగుణమ్మ తన కుమార్తె భారతి, మనుమరాళ్ల పేరిట గిఫ్ట్ డీడ్ రాసిచ్చారని న్యాయవాది పేర్కొన్నారు.

గతంలో ప్యాలెస్‌లోని గెస్ట్‌హౌస్‌లో తాత్కాలికంగా ఉండేందుకు వైఎస్ షర్మిల అనుమతి తీసుకున్నారని, అయితే ఇప్పుడు అలంకరణ పనుల పేరుతో బయటి వ్యక్తులను అక్కడికి పంపుతున్నారని పిటిషనర్ తరఫు న్యాయవాది ఆరోపించారు. దీనివల్ల ప్యాలెస్‌లోని కట్టడాలకు, విలువైన పండ్ల చెట్లకు నష్టం వాటిల్లే ప్రమాదం ఉందని కోర్టు దృష్టికి తీసుకెళ్లారు. ఈ వాదనలను పరిశీలించిన న్యాయస్థానం.. షర్మిల, ఆమె కుటుంబ సభ్యులు, అనుచరులు ప్యాలెస్‌లోకి ప్రవేశించకుండా మధ్యంతర ఉత్తర్వులు జారీ చేయగా, ఆ ఆదేశాలను అమలు చేసేందుకు పోలీసులు అక్కడ బందోబస్తు ఏర్పాటు చేశారు.