ఆసియా కప్ విజేతగా నిలిచిన టీమిండియా అండర్-19 క్రికెట్ జట్టును ఏపీ మాజీ ముఖ్యమంత్రి, వైసీపీ అధినేత వైఎస్ జగన్‌మోహన్‌రెడ్డి అభినందించారు.  అద్భుత ప్రదర్శనతో దేశం గర్వపడేలా చేశారని ‘ఎక్స్’ వేదికగా ప్రశంసించారు.

పాకిస్థాన్ నిర్దేశించిన 338 పరుగుల భారీ లక్ష్య ఛేదనలో భారత యువ క్రికెటర్లు అద్భుత పోరాట పటిమను కనబరిచారని కొనియాడారు. "కీలక సమయాల్లో వికెట్లు కోల్పోయినప్పటికీ, మన యువ క్రికెటర్లు సంయమనం కోల్పోకుండా ఆఖరి వరకు పోరాడి విజయాన్ని అందుకున్నారు" అని జగన్ పేర్కొన్నారు.

ముఖ్యంగా చివర్లో మనల్ చౌహాన్, మోహిత్ ఉల్వ బాధ్యతాయుతంగా ఆడి జట్టుకు విజయాన్ని అందించారని పేర్కొన్నారు. ఈ గెలుపు జట్టులోని ఆటగాళ్ల అసాధారణ ప్రతిభ, ధైర్యం, పట్టుదలకు నిదర్శనమని కొనియాడారు. భవిష్యత్తులో ఈ యువ ఛాంపియన్లు మరిన్ని ఉన్నత శిఖరాలను అధిరోహించాలని ఆకాంక్షిస్తున్నట్లు తెలిపారు.