ఐపీఎల్ 2027 మినీ వేలానికి ముందు లీగ్‌లో మరో సంచలన ట్రేడింగ్‌కు రంగం సిద్ధమవుతున్నట్లు ఊహాగానాలు వెలువడుతున్నాయి. ఢిల్లీ క్యాపిటల్స్ కెప్టెన్, స్టార్ ఆల్‌రౌండర్ అక్షర్ పటేల్‌ను ట్రేడింగ్ విండో ద్వారా చెన్నై సూపర్ కింగ్స్ (సీఎస్‌కే) దక్కించుకునే అవకాశం ఉందని జోరుగా ప్రచారం జరుగుతోంది. 

ఈ ఊహాగానాలపై భారత వెటరన్ స్పిన్నర్ రవిచంద్రన్ అశ్విన్ స్పందిస్తూ ఆశ్చర్యం వ్యక్తం చేశాడు. అక్షర్‌ను వదులుకోవడం ఢిల్లీ జట్టుకు తీరని నష్టమని విశ్లేషించాడు. "నాలుగు ఓవర్ల కోటాను సమర్థంగా పూర్తి చేయగల నాణ్యమైన లెఫ్ట్ ఆర్మ్ స్పిన్నర్‌తో పాటు, మిడిల్ ఆర్డర్‌లో బ్యాటింగ్ చేయగల ఆల్‌రౌండర్లు ఐపీఎల్‌లో చాలా అరుదు. అలాంటి విలువైన ఆటగాడిని ఢిల్లీ వదులుకోదని నేను భావిస్తున్నాను" అని అశ్విన్ పేర్కొన్నాడు. ఇప్పటికే రిషభ్ పంత్ ట్రేడ్ డీల్‌లో భాగంగా కుల్దీప్ యాదవ్ లక్నో సూపర్‌జెయింట్స్‌కు వెళ్లారన్న ప్రచారం నేపథ్యంలో, ఇప్పుడు అక్షర్ కూడా జట్టును వీడితే ఢిల్లీ స్పిన్ విభాగం మరింత బలహీనపడుతుందని అశ్విన్ అభిప్రాయపడ్డాడు.

ఒకవేళ ఈ ట్రేడ్ వాస్తవరూపం దాలిస్తే, ఢిల్లీ క్యాపిటల్స్‌కు కొత్త కెప్టెన్ అవసరం ఏర్పడుతుంది. గతంలో పంత్ కెప్టెన్సీ బాధ్యతలు నిర్వహించినప్పటికీ, మళ్లీ అతనికి ఆ బాధ్యతలు అప్పగిస్తే అది అతని బ్యాటింగ్‌పై ప్రభావం చూపవచ్చని అశ్విన్ విశ్లేషించాడు. పంత్‌పై ఒత్తిడి తగ్గించేందుకు అనుభవజ్ఞుడైన కేఎల్ రాహుల్‌ను కెప్టెన్‌గా నియమించడం మేలని సూచించాడు. మరోవైపు, ఈ డీల్‌లో భాగంగా సీఎస్‌కే తమ ఆటగాళ్లు డెవాల్డ్ బ్రెవిస్ లేదా నూర్ అహ్మద్‌ను ఢిల్లీకి ఇచ్చే అవకాశం ఉందనే అంచనాలు వినిపిస్తున్నాయి. అయితే, ప్రస్తుతం ఈ వార్తలన్నీ కేవలం ఊహాగానాల దశలోనే ఉన్నాయి.