టెస్ట్ క్రికెట్ చరిత్రలో జింబాబ్వే జట్టు ఒక అరుదైన ప్రపంచ రికార్డును నెలకొల్పింది. ఒకే టెస్ట్ మ్యాచ్‌లో రెండు ఇన్నింగ్స్‌ల్లోనూ 500కు పైగా పరుగులు చేసిన తొలి జట్టుగా చరిత్ర సృష్టించింది. షార్జా వేదికగా ఆఫ్ఘనిస్థాన్‌తో నిన్న‌ ముగిసిన తొలి టెస్టులో జింబాబ్వే ఈ చారిత్రక ఘనతను అందుకున్నట్టు ఐసీసీ తన అధికారిక వెబ్‌సైట్‌లో వెల్లడించింది.

ఈ మ్యాచ్‌లో టాస్ గెలిచి బ్యాటింగ్ ఎంచుకున్న జింబాబ్వే, తొలి ఇన్నింగ్స్‌లో 504 పరుగులు చేసింది. అనంతరం రెండో ఇన్నింగ్స్‌లోనూ పరుగుల వరద పారించి, ఐదో రోజు ఆట ముగిసే సమయానికి 5 వికెట్ల నష్టానికి 523 పరుగులు చేసింది. కెప్టెన్ క్రెయిగ్ ఎర్విన్ (206 నాటౌట్), వెస్లీ మధెవెరే (100 నాటౌట్) అజేయంగా నిలిచారు. సమయం ముగియడంతో మ్యాచ్ డ్రాగా ముగిసింది.

ఈ మ్యాచ్‌లో 41 ఏళ్ల 82 రోజుల వయసులో డబుల్ సెంచరీ సాధించిన క్రెయిగ్ ఎర్విన్ మరో రికార్డును కూడా తన ఖాతాలో వేసుకున్నాడు. టెస్టుల్లో డబుల్ సెంచరీ చేసిన మూడో అత్యంత పెద్ద వయస్కుడిగా నిలిచాడు. అతని కంటే ముందు దక్షిణాఫ్రికాకు చెందిన ఎరిక్ రోవన్, ఇంగ్లండ్‌కు చెందిన జాక్ హాబ్స్ ఉన్నారు. ఇరు జట్ల మధ్య రెండో, చివరి టెస్ట్ మ్యాచ్ ఇదే వేదికపై ఈ నెల‌ 13న ప్రారంభం కానుంది.