ప్రభుత్వ ఉద్యోగుల సస్పెన్షన్‌కు సంబంధించి సుప్రీంకోర్టు కీలక తీర్పు వెలువరించింది. ఏదైనా కేసులో అరెస్టయిన ప్రభుత్వ ఉద్యోగి 48 గంటలకు మించి జ్యుడీషియల్ కస్టడీలో ఉంటే, సదరు ఉద్యోగి ఆటోమేటిక్‌గా సస్పెన్షన్‌లో ఉన్నట్లే (డీమ్డ్ సస్పెన్షన్) పరిగణించాలని అత్యున్నత న్యాయస్థానం స్పష్టం చేసింది. ఇందుకు ప్రత్యేకంగా సస్పెన్షన్ ఉత్తర్వులు జారీ చేయాల్సిన అవసరం లేదని జస్టిస్ జేబీ పార్దీవాలా, జస్టిస్ మన్మోహన్‌లతో కూడిన ధర్మాసనం తేల్చి చెప్పింది.

బిహార్‌లోని సమస్తీపూర్ సదర్ ఆసుపత్రి మేనేజర్ విశ్వజీత్ సింగ్ దాఖలు చేసిన పిటిషన్‌పై విచారణ సందర్భంగా ధర్మాసనం ఈ వ్యాఖ్యలు చేసింది. ఒక కాంట్రాక్టర్‌కు సంబంధించిన రూ. 36,421 వేతన బకాయిలను క్లియర్ చేసేందుకు రూ. 4,000 లంచం డిమాండ్ చేశారన్న ఆరోపణలపై ఆయన అవినీతి నిరోధక చట్టం కింద అరెస్టయ్యారు. అరెస్టు అనంతరం ఆయన దాదాపు 15 రోజుల పాటు జ్యుడీషియల్ కస్టడీలో ఉన్నారు. ఈ కేసులో సెషన్స్ కోర్టు ఆయనకు బెయిల్ మంజూరు చేయగా, పాట్నా హైకోర్టు ఆ ఉత్తర్వులను రద్దు చేసింది.

దీనిపై ఆయన సుప్రీంకోర్టును ఆశ్రయించగా, ధర్మాసనం బెయిల్‌ను పునరుద్ధరించింది. అయితే, విచారణ క్రమంలో నిందితుడి సస్పెన్షన్‌ను రద్దు చేసి, తిరిగి అదే ఆసుపత్రిలో, అదే పోస్టులో నియమించడంపై ధర్మాసనం తీవ్ర ఆశ్చర్యం వ్యక్తం చేసింది. "ఇది షాక్‌కు గురిచేస్తోంది. ఈ అంశాన్ని రాష్ట్ర ప్రభుత్వం వెంటనే సమీక్షించాలి" అని న్యాయస్థానం ఆదేశించింది.

తీవ్రమైన నేరచరిత్ర లేని పక్షంలో ఇటువంటి కేసుల్లో సాధారణంగా బెయిల్ మంజూరు చేయాలని పేర్కొన్న సుప్రీంకోర్టు, పాట్నా హైకోర్టు ఉత్తర్వులను కొట్టివేసి, సెషన్స్ కోర్టు ఇచ్చిన బెయిల్‌ను పునరుద్ధరించింది.