హిమాచల్ ప్రదేశ్‌లోని స్పితిలో గల ఒక బౌద్ధ ఆశ్రమం వంటగదికి సంబంధించిన వీడియో ఒకటి ప్రస్తుతం ఇంటర్నెట్‌లో అందరి దృష్టిని ఆకర్షిస్తోంది. అక్కడి బౌద్ధ సన్యాసి టెన్ జిన్ షేర్ చేసిన ఈ వీడియో, వారి దైనందిన భోజన తయారీ విధానాన్ని ప్రపంచానికి పరిచయం చేసింది.

ఈ వీడియోలో బౌద్ధ భిక్షువులు ఒక సాధారణ వంటగదిలో సామూహికంగా పనులు చేసుకోవడం కనిపిస్తుంది. కూరగాయలు తరగడం, ‘బోలెప్ కోర్కున్’ అని పిలిచే మందపాటి రొట్టెలు చేయడం, ఇతర వంటకాలను సిద్ధం చేయడం వంటివి ఇందులో ఉన్నాయి. తెల్లవారుజామున 1 లేదా 2 గంటలకే వీరు అల్పాహారం తయారీని ప్రారంభిస్తారు. పనులన్నీ ఒకరికొకరు పంచుకుని పూర్తిచేస్తారు.

టెన్ జిన్ తెలిపిన వివరాల ప్రకారం, వంటగది బాధ్యతలను భిక్షువులందరూ వంతులవారీగా చూసుకుంటారు. వారి భోజనంలో ప్రతిరోజూ వైవిధ్యం ఉంటుంది. కూరగాయలు, టీతో పాటు రొట్టెలు, ఫ్రైడ్ రైస్, బిర్యానీ వంటివి కూడా తింటారు. కొన్నిసార్లు ‘చురా చీజ్‌’తో నింపిన టిబెటన్ ఫ్లాట్‌బ్రెడ్ ‘చురా బక్లాప్’ వంటి ప్రత్యేక వంటకాలను కూడా తయారు చేసుకుంటారు.

మందంగా కనిపించినప్పటికీ, ‘బోలెప్ కోర్కున్’ రొట్టెలు చాలా మెత్తగా, తినడానికి సులువుగా ఉంటాయని టెన్ జిన్ వివరించారు. ఈ వీడియో, బౌద్ధ ఆశ్రమంలోని క్రమశిక్షణ, సమష్టితత్వం, వారి సాదాసీదా జీవనశైలిని తెలియజేస్తోందని నెటిజన్లు కామెంట్స్ చేస్తున్నారు.