ప్రముఖ పారిశ్రామికవేత్త హర్ష్ గోయెంకా, విదేశాల్లో భారత పర్యాటకుల ప్రవర్తనపై మరోసారి తన అసంతృప్తిని వ్యక్తం చేశారు. వియత్నాంలోని ఒక ఎయిర్‌పోర్ట్‌లో కొందరు భారత ప్రయాణికులు టెర్మినల్ నేలపై కూర్చుని భోజనం చేస్తున్న వీడియోను ఆయన సోషల్ మీడియాలో షేర్ చేశారు. ఈ ఘటన విదేశాల్లో భారతీయుల పౌర స్పృహపై తీవ్ర చర్చకు దారితీసింది.

ఈ నెల‌ 7న హర్ష్ గోయెంకా తన 'ఎక్స్‌' ఖాతాలో ఈ వీడియోను పోస్ట్ చేశారు. ఈ వీడియోలో పలువురు భారత ప్రయాణికులు ఎయిర్‌పోర్ట్ లాంజ్‌లో నేలపై కూర్చుని, డిస్పోజబుల్ ప్లేట్లలో ఆహారాన్ని పెట్టుకుని తింటున్న దృశ్యాలు స్పష్టంగా కనిపిస్తున్నాయి. ఇటీవలి కాలంలో వియత్నాం భారత పర్యాటకులకు ఇష్టమైన గమ్యస్థానంగా మారుతున్న నేపథ్యంలో ఈ ఘటన చోటుచేసుకోవడం గమనార్హం.

ఈ వీడియోను షేర్ చేస్తూ గోయెంకా ఒక కీలకమైన ప్రశ్నను లేవనెత్తారు. "వియత్నాం భారత ప్రయాణికులకు ఇష్టమైన కొత్త ప్రదేశంగా మారింది. కానీ, మనం వారి ఎయిర్‌పోర్ట్‌లను పిక్నిక్ స్పాట్‌లుగా మార్చేసి, ఆహారాన్ని పరుచుకుని, చెత్తను వదిలేస్తే.. మనల్ని ఎవరూ ఇష్టపడని పర్యాటకులుగా చూసే ప్రమాదం ఉంది. ప్రయాణాల్లో పౌర స్పృహతో మెలగడం మనం ఎప్పుడు నేర్చుకుంటాం?" అని ఆయన తన పోస్టులో ఆవేదన వ్యక్తం చేశారు.

ఈ పోస్ట్ సోషల్ మీడియాలో వైరల్ అయింది. నెటిజన్ల నుంచి మిశ్రమ స్పందనలు వెల్లువెత్తాయి. చాలా మంది, ఒక అంతర్జాతీయ విమానాశ్రయంలో ఇలా ప్రవర్తించడం సరికాదని, ఇది దేశ ప్రతిష్ఠ‌కు భంగం కలిగించే చర్య అని విమర్శించారు. సింగపూర్ వంటి దేశాల్లో పరిశుభ్రత విషయంలో ఎంత కఠినంగా ఉంటారో గుర్తు చేస్తూ కామెంట్లు చేశారు. 

మరికొందరు, ఈ ఘటన విదేశాల్లో భారత పర్యాటకులపై ఉన్న అభిప్రాయాన్ని మరింత బలపరిచేలా ఉందని పేర్కొన్నారు. గతంలో కూడా విదేశాల్లో భారత పర్యాటకుల ప్రవర్తనకు సంబంధించిన కొన్ని వీడియోలపై గోయెంకా స్పందించారు. తాజా ఘటనతో ఈ అంశం మరోసారి చర్చనీయాంశమైంది.