పరీక్షల్లో మంచి మార్కులు సాధిస్తే పిల్లలకు తల్లిదండ్రులు బహుమతులు ఇవ్వడం సాధారణమే. కానీ, పశ్చిమ బెంగాల్‌కు చెందిన ఓ వ్యాపారి తన ప్రేమను, ప్రోత్సాహాన్ని వినూత్న రీతిలో చాటుకున్నారు. 9వ తరగతి చదువుతున్న తన కొడుకు హాఫ్ ఇయర్లీ పరీక్షల్లో మంచి ప్రతిభ కనబరచడంతో ఏకంగా రూ.2 కోట్లకు పైగా విలువైన లగ్జరీ స్పోర్ట్స్ కారును బహుమతిగా ఇచ్చి అందరినీ ఆశ్చర్యపరిచారు. ఈ ఘటన ఇప్పుడు సోషల్ మీడియాలో చర్చకు దారితీసింది.

వివరాల్లోకి వెళితే.. పశ్చిమ బెంగాల్‌లోని పుర్బా బర్ధమాన్ జిల్లా, గల్సి ప్రాంతంలోని పరాజ్ గ్రామానికి చెందిన బియ్యం వ్యాపారి షంసుద్దీన్ మిద్యా. ఆయన 15 ఏళ్ల కుమారుడు మహమ్మద్ తల్హా 9వ తరగతి చదువుతున్నాడు. అతనికి ఎప్పటినుంచో బీఎండబ్ల్యూ ఎం4 కాంపిటీషన్ స్పోర్ట్స్ కారు అంటే ఎంతో ఇష్టం. ఈ క్రమంలో హాఫ్ ఇయర్లీ పరీక్షలు బాగా రాస్తే ఆ కారు కొనిస్తానని తండ్రి మాట ఇచ్చారు. అనుకున్నట్టుగానే తల్హా పరీక్షల్లో మంచి మార్కులు సాధించడంతో తండ్రి షంసుద్దీన్ తన మాట నిలబెట్టుకున్నారు.

కొడుకు కోరిక తీర్చడం కోసం ఆయన ముంబైలోని అంధేరిలో ఉన్న బీఎండబ్ల్యూ షోరూమ్‌కు వెళ్లి కారును కొనుగోలు చేశారు. అనంతరం దాన్ని ఓ ప్రత్యేకమైన కంటైనర్‌లో ఈ నెల‌ 6న తమ గ్రామానికి తెప్పించారు. కంటైనర్ నుంచి కారును కిందకు దించుతున్నప్పుడు గ్రామస్థులంతా ఆసక్తిగా తిలకించారు. ఈ కారు ధర సుమారు రూ.1.62 కోట్ల నుంచి రూ.2.30 కోట్ల మధ్య ఉంటుందని అంచనా. 

అయితే, తల్హా వయసు 15 ఏళ్లు కావడంతో అతనికి డ్రైవింగ్ లైసెన్స్ లేదు. అందువల్ల ప్రస్తుతానికి కారును తానే నడుపుతానని, కొడుక్కి లైసెన్స్ వచ్చాక అప్పగిస్తానని తండ్రి షంసుద్దీన్ తెలిపారు. ఆయన వద్ద ఇప్పటికే రేంజ్ రోవర్, వోల్వో వంటి పలు లగ్జరీ కార్లు ఉన్నాయి. కాగా, ఓ స్కూల్ విద్యార్థికి ఇంతటి ఖరీదైన బహుమతి ఇవ్వడంపై సోషల్ మీడియాలో భిన్నాభిప్రాయాలు వ్యక్తమవుతున్నాయి. కుటుంబపరమైన ఈ విషయం ఇప్పుడు దేశవ్యాప్తంగా వార్తల్లో నిలిచింది.