ఆస్ట్రేలియా టెస్ట్ జట్టులో తిరిగి చోటు దక్కించుకోవాలనే పట్టుదలతో ఉన్న యువ బ్యాటర్ శామ్ కాన్‌స్టాస్, అద్భుత శతకంతో ఆక‌ట్టుకున్నాడు. షెఫీల్డ్ షీల్డ్ టోర్నీలో భాగంగా సౌత్ ఆస్ట్రేలియాతో జరుగుతున్న మ్యాచ్‌లో ఈ వేసవిలో తన మూడో సెంచరీని నమోదు చేసి, న్యూసౌత్‌వేల్స్ (ఎన్ఎస్‌డ‌బ్ల్యూ) జట్టును పటిష్ఠ‌ స్థితిలో నిలిపాడు.

సిడ్నీ వేదికగా జరుగుతున్న ఈ మ్యాచ్‌లో రెండో రోజు ఆట ముగిసే సమయానికి కాన్‌స్టాస్ 109 పరుగులతో అజేయంగా నిలిచాడు. అతని హీరోయిక్ ఇన్నింగ్స్ ఫలితంగా ఎన్ఎస్‌డ‌బ్ల్యూ రెండో ఇన్నింగ్స్‌లో 2 వికెట్లకు 191 పరుగులు చేసి, 70 పరుగుల ఆధిక్యాన్ని సంపాదించింది. తొలి ఇన్నింగ్స్‌లో కేవలం 204 పరుగులకే ఆలౌట్ అయి కష్టాల్లో పడిన జట్టును కాన్‌స్టాస్ ఆదుకున్నాడు. మరో బ్యాటర్ కుర్టిస్ ప్యాటర్సన్‌తో కలిసి రెండో వికెట్‌కు 117 పరుగుల కీలక భాగస్వామ్యాన్ని నెలకొల్పాడు.

గత ఏడాది జూలైలో ఐదు టెస్టులు ఆడిన తర్వాత జాతీయ జట్టులో స్థానం కోల్పోయిన ఈ 21 ఏళ్ల యువకుడు, అప్పటి నుంచి దేశవాళీ క్రికెట్‌లో పరుగుల వరద పారిస్తున్నాడు. ఈ క్రమంలోనే డిసెంబర్‌లో న్యూజిలాండ్‌తో ప్రారంభం కానున్న టెస్ట్ సిరీస్‌కు తనను ఎంపిక చేయాలంటూ సెలక్టర్లకు గట్టి సంకేతాలు పంపుతున్నాడు. 

ఈ సీజన్‌లో అతను ఆడిన గత నాలుగు దేశవాళీ మ్యాచ్‌లలో ఇది మూడో సెంచరీ కావడం విశేషం. ఈ అజేయ శతకంతో పాటు  షెఫీల్డ్ షీల్డ్‌లో 71, 151 (నాటౌట్‌), 5, 2, 24 పరుగులు, ఇటీవల 50 ఓవర్ల మ్యాచ్‌లో 149 పరుగులు చేసిన అతని గణాంకాలు, సెలక్టర్ల మదిలో అతని పేరును స్థిరంగా ఉంచుతున్నాయి. ఆస్ట్రేలియా-న్యూజిలాండ్ మధ్య తొలి టెస్ట్ డిసెంబర్ 9న పెర్త్‌లో ప్రారంభం కానుంది.