వయసు కేవలం ఒక సంఖ్య మాత్రమేనని, ప్రతిభకు, ఆత్మవిశ్వాసానికి వృత్తితో సంబంధం లేదని నిరూపిస్తున్నారు ఓ వృద్ధ ఆటో డ్రైవర్. మహారాష్ట్రలోని అమరావతికి చెందిన ఈయన, అనర్గళంగా ఇంగ్లీషులో మాట్లాడుతున్న వీడియో ఇప్పుడు సోషల్ మీడియాలో మరోసారి వైరల్‌గా మారింది. చూసిన ప్రతి ఒక్కరి చేత ప్రశంసలు అందుకుంటోంది.

వివరాల్లోకి వెళితే.. ఇన్‌స్టాగ్రామ్‌ యూజర్ భూషణ్ పోహానే గతంలో షేర్ చేసిన ఈ వీడియోలో, ఓ వృద్ధ ఆటో డ్రైవర్ ఒక యువకుడితో ఇంగ్లీష్ భాష ప్రాముఖ్యత గురించి వివరిస్తుండటం కనిపిస్తుంది. "నేను చెప్పేది జాగ్రత్తగా విను. నీకు ఇంగ్లీష్ వస్తే లండన్, ప్యారిస్, అమెరికా వెళ్లగలవు. అదే నీకు ఇంగ్లీష్ రాకపోతే అక్కడికి వెళ్లలేవు" అని ఆయన స్పష్టంగా చెప్పారు. 

ఇంగ్లీష్ ఒక అంతర్జాతీయ భాష అని, విదేశాల్లో స్పష్టంగా మాట్లాడటానికి ఇది ఎంతో అవసరమని ఆయన తెలిపారు. ఉదాహరణకు, ఒక హోటల్‌లో వెయిటర్‌ను మంచినీళ్లు అడగాలంటే ఇంగ్లీషులోనే అడగాలని, మరాఠీలో అడిగితే వారికి అర్థం కాదని ఆయన వివరించారు.

ఈ వీడియో చూసిన నెటిజన్లు ఆయన ఆత్మవిశ్వాసానికి, స్పష్టమైన ఉచ్చారణకు ముగ్ధులవుతున్నారు. స్థానికుల కథనం ప్రకారం ఈయనను అందరూ 'యాదవ్ చాచా' అని ఆప్యాయంగా పిలుస్తారు. ఆయన చాలా కష్టపడి పనిచేస్తారని, దయగలవారని, ఎంతో స్నేహపూర్వకంగా ఉంటారని చెబుతున్నారు. చాలా ఏళ్లుగా ఆయన అందరినీ ఇంగ్లీషులోనే పలకరిస్తారని, వ్యక్తిగతంగా ఎన్నో కష్టాలను ఎదుర్కొన్నారని స్థానికులు పేర్కొన్నారు.

మొదట 2024లో ఈ వీడియో వైరల్ కాగా, ఇప్పుడు మళ్లీ సోషల్ మీడియాలో విస్తృతంగా చక్కర్లు కొడుతోంది. ఆయన మాట్లాడే తీరు దివంగత మాజీ రాష్ట్రపతి ఏపీజే అబ్దుల్ కలాంను గుర్తు చేస్తోందని పలువురు నెటిజన్లు కామెంట్స్ చేస్తున్నారు. చదువుతో సంబంధం లేకుండా, సామాన్య జీవితం గడుపుతున్న వారిలోనూ అద్భుతమైన నైపుణ్యాలు, ఆత్మవిశ్వాసం ఉంటాయని యాదవ్ చాచా కథ నిరూపిస్తోంది.