59 ఏళ్ల వయసులో.. అదీ 30 ఏళ్ల పాటు పనిచేసిన సంస్థ నుంచి అకస్మాత్తుగా ఉద్యోగం కోల్పోతే ఎవరైనా నిరాశకు గురవుతారు. కానీ, మే లీ అనే మహిళ మాత్రం ఈ ఊహించని పరిణామాన్ని తన జీవితంలోనే అతిపెద్ద సాహసంగా మలచుకున్నారు. టెక్ దిగ్గజం హెచ్‌పీ (హ్యూలెట్-ప్యాకర్డ్)లో మూడు దశాబ్దాల కెరీర్‌కు గత ఏడాది తెరపడటంతో, ఆమె ఏకంగా అంటార్కిటికాలో కొత్త ఉద్యోగంలో చేరి అందరినీ ఆశ్చర్యపరిచారు.

1987లో హెచ్‌పీలో సాఫ్ట్‌వేర్ ఇంజనీరింగ్ ఇంటర్న్‌గా చేరిన మే లీ, మార్కెటింగ్ విభాగంలో ఉన్నత స్థాయికి ఎదిగారు. అక్కడే రిటైర్ అవ్వాలని భావిస్తున్న తరుణంలో, 2025 ఫిబ్రవరిలో లేఆఫ్ రూపంలో ఆమె కెరీర్‌కు బ్రేక్ పడింది. కొత్త ఉద్యోగాల కోసం ప్రయత్నించినా పెద్దగా ఫలితం లేకపోవడంతో, తనకు ఎంతో ఇష్టమైన అంటార్కిటికాలో అవకాశాలను వెతకడం ప్రారంభించారు. గతంలో రెండుసార్లు పర్యాటకురాలిగా అక్కడికి వెళ్లిన అనుభవం ఆమెను ఈ దిశగా ప్రోత్సహించింది.

కఠినమైన ఎంపిక ప్రక్రియ, ఫిజికల్ టెస్టుల తర్వాత, యూఎస్ అంటార్కిటిక్ ప్రోగ్రామ్‌కు సేవలందించే అమెంటమ్ అనే కాంట్రాక్టర్ సంస్థలో సప్లై టెక్నీషియన్‌గా ఆమె ఉద్యోగం సంపాదించారు. గతంలో డెస్క్ ముందు కూర్చుని పనిచేసిన లీ, ఇప్పుడు మెక్‌మర్డో స్టేషన్‌లోని ఐటీ వేర్‌హౌస్‌లో ఫోర్క్‌లిఫ్ట్ నడపడం, సరుకులను మోయడం వంటి శారీరక శ్రమతో కూడిన పనులు చేస్తున్నారు. జీతం తక్కువే అయినా, ఆర్థికంగా స్థిరంగా ఉండటంతో ఈ అవకాశాన్ని సద్వినియోగం చేసుకున్నారు.

మెక్‌మర్డో స్టేషన్‌లోని వాతావరణం ఓ కాలేజీ పట్టణాన్ని తలపిస్తుందని, అక్కడి సిబ్బంది మధ్య బలమైన స్నేహ బంధం ఉందని లీ వివరించారు. త్వరలో ప్రారంభం కానున్న సీజన్‌లో బ్రాడ్‌కాస్ట్ ఇంజనీర్‌గా మరో కొత్త పాత్రలో అక్కడికి తిరిగి వెళ్లేందుకు ఆమె సిద్ధమవుతున్నారు. అనుకోకుండా ఎదురైన ఓటమిని, తన జీవితంలో మరపురాని సాహసయాత్రగా మార్చుకుని ఎంతోమందికి స్ఫూర్తిగా నిలుస్తున్నారు.