ఉత్తరప్రదేశ్‌లోని సహారన్‌పూర్‌లో పోలీసుల నుంచి ఒక అనూహ్య పొరపాటు దొర్లింది. సుప్రీంకోర్టు న్యాయమూర్తికి సమర్పించాల్సిన గౌరవ వందనాన్ని (గార్డ్ ఆఫ్ హానర్) పొరపాటున ఏఐఎంఐఎం అధినేత, ఎంపీ అసదుద్దీన్ ఒవైసీకి అందజేశారు. ఈ ఘటనపై ఉన్నతాధికారులు విచారణకు ఆదేశించారు.

వివరాల్లోకి వెళితే.. శనివారం ఉదయం సహారన్‌పూర్‌లోని సర్క్యూట్ హౌస్‌కు సుప్రీంకోర్టు న్యాయమూర్తి ఒకరు రానున్నట్లు పోలీసులకు సమాచారం అందింది. ఆయనకు స్వాగతం పలికేందుకు, గౌరవ వందనం సమర్పించేందుకు ఓ పోలీస్ బృందం అక్కడ సిద్ధంగా ఉంది. అయితే, న్యాయమూర్తి చేరుకోవడానికంటే ముందే ఒవైసీ తన కాన్వాయ్‌తో సర్క్యూట్ హౌస్‌కు చేరుకున్నారు.

ఒవైసీ వాహనం దిగగానే, అక్కడున్న పోలీసులు ఆయన్ను సుప్రీంకోర్టు న్యాయమూర్తిగా భావించి గౌరవ వందనం సమర్పించారు. ఒవైసీ సైతం ఆ వందనాన్ని స్వీకరించి లోపలికి వెళ్లారు. 2027 యూపీ అసెంబ్లీ ఎన్నికల నేపథ్యంలో ఆజాద్ సమాజ్ పార్టీ అధినేత చంద్రశేఖర్ ఆజాద్‌తో కలిసి 'సామాజిక్ పరివర్తన్ మోర్చా' కూటమి తరఫున రాజకీయ కార్యక్రమాల్లో పాల్గొనేందుకు ఒవైసీ సహారన్‌పూర్‌కు వచ్చారు.

ఈ ఘటనపై ఎస్పీ (సిటీ) వ్యోమ్ బిందాల్ స్పందిస్తూ.. "ఇది ఉద్దేశపూర్వకంగా జరిగిన పని కాదు. సిబ్బంది పొరపాటున ఎంపీకి గౌరవ వందనం సమర్పించారు. దీనిపై పూర్తిస్థాయి విచారణకు ఆదేశించాం" అని తెలిపారు. ప్రొటోకాల్ నిబంధనల ప్రకారం, ఎంపీలకు కేవలం సెల్యూట్ మాత్రమే చేయాల్సి ఉంటుంది. 'గార్డ్ ఆఫ్ హానర్'ను కేవలం నిర్దేశిత ఉన్నతాధికారులకు మాత్రమే ఇస్తారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అయింది. విచారణ నివేదిక ఆధారంగా నిబంధనల మేరకు బాధ్యులపై చర్యలు తీసుకుంటామని పోలీసులు వెల్లడించారు.