హైదరాబాద్‌లోని హెచ్‌ఐసీసీ వేదికగా జరుగుతున్న ‘భారత్ సమ్మిట్’ నేపథ్యంలో తెలంగాణలో రాజకీయ వాతావరణం ఒక్కసారిగా వేడెక్కింది. ఈ సదస్సు ముగింపు సమావేశాలకు కాంగ్రెస్ అగ్రనేత, ఎంపీ రాహుల్ గాంధీ హాజరవుతున్న క్రమంలో ఆయన పర్యటనను అడ్డుకుంటామని బీజేపీ ప్రకటించింది. ఈ నేపథ్యంలో ఎలాంటి శాంతిభద్రతల సమస్యలు తలెత్తకుండా ఉండేందుకు తెలంగాణ బీజేపీ రాష్ట్ర అధ్యక్షుడు రాంచందర్‌ రావును పోలీసులు ముందస్తుగా హౌస్ అరెస్ట్ చేశారు.

ఈ ఉదయం తార్నాకలోని రాంచందర్‌రావు నివాసం వద్ద ఉస్మానియా యూనివర్సిటీ పోలీసులు భారీగా మోహరించారు. ఆయన ఇంటి నుంచి బయటకు రాకుండా గృహనిర్బంధంలో ఉంచారు. రాహుల్ గాంధీ పర్యటనను అడ్డుకోవడంతో పాటు సమ్మిట్‌కు వ్యతిరేకంగా రాష్ట్రవ్యాప్తంగా బీజేపీ శ్రేణులు నల్లజెండాలతో నిరసనలు చేపట్టాలని రాంచందర్‌రావు పిలుపునివ్వడమే పోలీసుల చర్యకు కారణమైంది.

తన గృహనిర్బంధంపై రాంచందర్‌రావు తీవ్రంగా స్పందించారు. ఈ సందర్భంగా ఆయన మాట్లాడుతూ కాంగ్రెస్ తీరును తప్పుబట్టారు. "భారత్ సమ్మిట్ పేరుతో విదేశీయులను ఆహ్వానించి దేశ ప్రతిష్టను, ప్రధాని మోదీ ప్రభుత్వాన్ని కించపరిచే ప్రయత్నం చేస్తున్నారు" అని ఆయన ఆరోపించారు. దేశ వ్యతిరేక శక్తులతో కలిసి ఈ సదస్సును నిర్వహిస్తున్నారని, రాహుల్ గాంధీని రీలాంచ్ చేసేందుకే దీనిని వేదికగా మార్చుకున్నారని ఆయన విమర్శించారు.

మరోవైపు తమ పార్టీ అధ్యక్షుడి హౌస్ అరెస్ట్‌పై బీజేపీ వర్గాలు తీవ్ర ఆగ్రహం వ్యక్తం చేస్తున్నాయి. ప్రజాస్వామ్యబద్ధంగా నిరసన తెలిపే హక్కును కాంగ్రెస్ ప్రభుత్వం అణచివేస్తోందని ఆరోపించాయి. హెచ్‌ఐసీసీ పరిసరాల్లో పాటు నగరంలోని పలు ప్రాంతాల్లో పోలీసులు భద్రతను కట్టుదిట్టం చేశారు.