తిరుమల శ్రీవారి ఆలయం భక్తులతో కిటకిటలాడుతోంది. స్వామివారి దర్శనం కోసం వేలాదిగా భక్తులు తరలివస్తుండటంతో కొండపై భారీ రద్దీ కొనసాగుతోంది. తిరుమల తిరుపతి దేవస్థానం (టీటీడీ) వెల్లడించిన వివరాల ప్రకారం, వైకుంఠం క్యూ కాంప్లెక్స్‌లోని కంపార్ట్‌మెంట్లు అన్నీ నిండిపోయాయి. దీంతో క్యూలైన్లు వెలుపల శిలాతోరణం వరకు ఉన్నాయి.

ప్రస్తుత పరిస్థితుల్లో, సర్వదర్శనం కోసం టోకెన్లు లేని భక్తులకు శ్రీవారి దర్శనానికి సుమారు 15 గంటల సమయం పడుతుందని అధికారులు వెల్ల‌డించారు. భక్తుల రద్దీకి అనుగుణంగా టీటీడీ అధికారులు ఏర్పాట్లను పర్యవేక్షిస్తున్నారు.

ఇక‌, నిన్న ఒక్కరోజే 70,124 మంది భక్తులు శ్రీవారిని దర్శించుకున్నారు. వీరిలో 32,298 మంది తలనీలాలు సమర్పించారు. హుండీ ద్వారా రూ.4.92 కోట్ల ఆదాయం లభించగా, మొత్తం 4.03 లక్షల లడ్డూలను విక్రయించినట్లు టీటీడీ తెలిపింది. వారాంతం కావడంతో భక్తుల రద్దీ మరింత పెరిగే అవకాశం ఉందని భావిస్తున్నారు.