విజయవాడ నగరంలో తీవ్ర కలకలం రేపిన ఘటన వెలుగుచూసింది. కృష్ణలంక పరిధిలోని పండిట్ నెహ్రూ బస్టాండ్ ఎదురుగా ఉన్న ఒక లాడ్జిలో మహిళ అనుమానాస్పద స్థితిలో విగతజీవిగా పడి ఉండటం స్థానికంగా తీవ్ర భయాందోళనలకు దారితీసింది. మృతురాలిని పైడిశెట్టి ఎర్రమ్మగా పోలీసులు గుర్తించారు.

వివరాల్లోకి వెళితే.. ఎర్రమ్మ గత రెండు రోజులుగా కనిపించకుండా పోవడంతో ఆమె భర్త సూర్యారావుపేట పోలీస్ స్టేషన్‌లో మిస్సింగ్ ఫిర్యాదు చేశారు. కేసు నమోదు చేసుకున్న పోలీసులు ఆమె ఆచూకీ కోసం గాలిస్తుండగానే, కృష్ణలంకలోని ఓ లాడ్జి గదిలో ఆమె మృతదేహం లభ్యమైంది. దీంతో ఈ కేసు హత్య కేసుగా మారింది.

పోలీసుల ప్రాథమిక దర్యాప్తు ప్రకారం, ఎర్రమ్మ ఓ యువకుడితో కలిసి లాడ్జికి వచ్చినట్లు తెలిసింది. ఆ గదిలోనే ఆమెను హతమార్చిన అనంతరం, నిందితుడు బయటకు వచ్చి గదికి తాళం వేసి అక్కడి నుంచి పరారైనట్లు పోలీసులు అనుమానిస్తున్నారు. లాడ్జి సిబ్బంది సమాచారంతో పోలీసులు ఘటనా స్థలానికి చేరుకుని పరిశీలించారు.

పోలీసులు అక్కడ లభ్యమైన ఆధారాలను సేకరించడంతో పాటు మృతదేహాన్ని శవపరీక్ష నిమిత్తం ఆసుపత్రికి తరలించారు. నిందితుడిని గుర్తించేందుకు లాడ్జి పరిసరాల్లోని సీసీటీవీ కెమెరా ఫుటేజీలను క్షుణ్ణంగా పరిశీలిస్తున్నారు. ఈ హత్యకు గల కారణాలు, నిందితుడితో ఆమెకు ఉన్న సంబంధం ఏమిటనే కోణాల్లో పోలీసులు లోతుగా దర్యాప్తు చేస్తున్నారు. నిందితుడి కోసం ప్రత్యేక బృందాలతో గాలింపు చర్యలు ముమ్మరం చేశారు.