స్వీట్లు కనిపిస్తే ఒక్కటి తినాలనుకుంటాం.. అది తిన్నాక మరొకటి.. ఇంకొకటి అంటూ చేయి మళ్లీ మళ్లీ వాటి వైపే వెళ్తుంటుంది. ఇలాంటి అలవాటును కేవలం మనసును నియంత్రించుకోవడం ద్వారా మాత్రమే ఆపలేమంటున్నారు న్యూట్రిషనిస్ట్‌ నమామి అగర్వాల్‌. స్వీట్లలోని చక్కెర, కొవ్వు పదార్థాల కలయిక మెదడులోని రివార్డ్‌ వ్యవస్థను ఉత్తేజపరుస్తుంది. దీంతో మరొకటి తినాలనే కోరిక కలుగుతుంది. అయితే స్వీట్లను పూర్తిగా మానేయాల్సిన అవసరం లేకుండానే కొన్ని చిన్న మార్పులతో తినే అలవాటును మెరుగుపరచుకోవచ్చని ఆమె సూచిస్తున్నారు.

1. ఒక్కసారి ఒక్క స్వీటే తీసుకోండి
స్వీట్ల డబ్బాను పక్కన పెట్టుకొని ఇష్టమొచ్చినప్పుడల్లా ఒక్కోటి తీసుకొని తినడం మంచిది కాదు. ఒకేసారి ఒక స్వీట్‌ను మాత్రమే ప్లేట్‌లో పెట్టుకోవాలి. దాన్ని ఆస్వాదిస్తూ నెమ్మదిగా తినాలి. ఇలా చేయడం వల్ల తెలియకుండానే ఎక్కువ స్వీట్లు తినే అలవాటును తగ్గించుకోవచ్చు

2. స్వీట్లతో పాటు నట్స్‌, సీడ్స్‌ తీసుకోండి
స్వీట్లను మాత్రమే తినకుండా వాటితో పాటు నట్స్‌ లేదా సీడ్స్‌ తీసుకోవాలని నమామి సూచిస్తున్నారు. బాదం, ఇతర గింజలు, విత్తనాల్లో ప్రొటీన్‌, ఆరోగ్యకరమైన కొవ్వులు, ఫైబర్‌ ఉంటాయి. ఇవి కడుపు నిండిన భావన కలిగించడంలో తోడ్పడతాయి. దీంతో వెంటనే మరో స్వీట్‌ తినాలనే కోరిక తగ్గవచ్చు. అయితే దీనివల్ల స్వీట్‌ ఆరోగ్యకరమైన ఆహారంగా మారిపోతుందని కాదు.

3. నీళ్లు తాగడం మర్చిపోవద్దు
దాహాన్ని కొన్నిసార్లు ఆకలిగా పొరబడే అవకాశం ఉందని న్యూట్రిషనిస్ట్‌ చెబుతున్నారు. శరీరానికి సరిపడా నీరు అందకపోతే ఏదైనా తినాలనే కోరిక కలగవచ్చు. నిజానికి ఆ సమయంలో శరీరానికి కావాల్సింది ఆహారం కాకుండా నీరు కావచ్చు. అందుకే స్వీట్‌ లేదా ఇతర చిరుతిండి తీసుకునే ముందు ఒక గ్లాసు నీళ్లు తాగాలని సూచిస్తున్నారు. ముఖ్యంగా స్నాక్స్‌ తినడానికి ముందు శరీరానికి తగినంత నీరు అందిందో? లేదో? చూసుకోవాలి.