అమెరికా డాలర్‌తో పోలిస్తే భారత రూపాయి విలువ పెరిగింది. సోమవారం ఉదయం ట్రేడింగ్‌లో 25 పైసలు లాభపడి 93.68 స్థాయికి చేరింది. అంతర్జాతీయ మార్కెట్‌లో ముడి చమురు ధరలు తగ్గడం, విదేశీ పెట్టుబడుల ప్రవాహం మెరుగుపడటం, పశ్చిమాసియాలో ఉద్రిక్తతలు తగ్గవచ్చన్న ఆశలు రూపాయికి అండగా నిలిచాయి.

గత వారం కూడా రూపాయి బలమైన ప్రదర్శన కనబరిచింది. 2026లోనే అత్యుత్తమ వారపు లాభాన్ని నమోదు చేస్తూ దాదాపు ఒక శాతం పుంజుకుంది. ఏప్రిల్‌ తర్వాత అత్యధిక స్థాయికి చేరింది. శుక్రవారం ఒక్కరోజే 43 పైసలు పెరిగి డాలర్‌తో పోలిస్తే 93.98 వద్ద ముగిసింది.

సోమవారం డాలర్‌తో పోలిస్తే రూపాయి 93.90 సమీపంలో ప్రారంభమై 93.70 స్థాయిలో ట్రేడవుతోంది. రూపాయి పుంజుకోవడానికి విదేశీ పోర్ట్‌ఫోలియో పెట్టుబడులు సుమారు 1.5 బిలియన్‌ డాలర్లు రావడం, అమెరికా డాలర్‌ బలహీనపడటం, చమురు ధరలు తగ్గడం కూడా దోహదపడ్డాయి. మరోవైపు సోమవారం బ్రెంట్‌ ముడి చమురు ధర బ్యారెల్‌కు 98.17 డాలర్ల వద్ద ట్రేడవుతూ 0.15 శాతం తగ్గింది.

ఇరాన్‌ అణు కార్యక్రమం, హర్మూజ్‌ జలసంధిపై చర్చల్లో గణనీయమైన పురోగతి సాధిస్తే మరిన్ని సైనిక దాడులు జరిగే అవకాశం లేదని అమెరికా అధ్యక్షుడు డొనాల్డ్‌ ట్రంప్‌ వారాంతంలో సంకేతాలివ్వడం మార్కెట్‌ సెంటిమెంట్‌ను మెరుగుపరిచింది. అయితే అమెరికాలో ఉద్యోగ గణాంకాలు అంచనాలను మించడంతో ఫెడరల్‌ రిజర్వ్‌ వడ్డీ రేట్లు పెంచవచ్చన్న అంచనాలు బలపడ్డాయి. డిసెంబరులో వడ్డీ రేటు పెంపునకు 81 శాతం అవకాశముందని మార్కెట్లు అంచనా వేస్తున్నాయి.