బాలీవుడ్ స్టార్ నటి ఆలియా భట్ తన కుటుంబంతో కలిసి జరుపుకున్న దీపావళి వేడుకల ఫోటోలను సోషల్ మీడియాలో పంచుకుంది. భర్త రణ్‌బీర్ కపూర్, కూతురు రాహా, అత్తగారు నీతూ కపూర్‌లతో కలిసి ఆమె పండగను ఘనంగా జరుపుకున్నారు. ఈ ఫోటోలు ప్రస్తుతం సోషల్ మీడియాలో వైరల్ అవుతున్నాయి.

ఈ వేడుకల కోసం ఆలియా భట్ పాస్టెల్ గ్రీన్, ఐవరీ రంగు కలగలిపిన సాంప్రదాయ దుస్తులు ధరించింది. దీనికి తగినట్లుగా బంగారు ఆభరణాలు, మాంగ్ పట్టీతో ఎంతో ఆకర్షణీయంగా కనిపించింది. పంచుకున్న ఫోటోలలో, దివంగత నటుడు రిషి కపూర్ చిత్రపటానికి పూలమాల వేసి, దాని ముందు ఆలియా, రణ్‌బీర్, నీతూ కపూర్ నిలబడి ఉండటం అందరినీ ఆకట్టుకుంది.

మరో ఫోటోలో ఈ జంట లక్ష్మీ పూజ నిర్వహిస్తుండగా, ఇంకొకదాంట్లో కూతురు రాహాతో ఉన్న క్షణాలను పంచుకున్నారు. అయితే, ఎప్పటిలాగే తమ కూతురి ముఖం కనిపించకుండా హార్ట్ ఎమోజీతో కవర్ చేశారు. "నా జీవితానికి వెలుగు మీరే. మీ అందరికీ దీపావళి శుభాకాంక్షలు. మీరు ప్రేమతో చుట్టుముట్టబడాలని కోరుకుంటున్నాను" అని ఆలియా ఈ పోస్ట్‌కు క్యాప్షన్ జోడించింది.

అనంతరం, బాల్కనీలోకి వచ్చిన ఈ కుటుంబం, అక్కడ వేచి ఉన్న ఫోటోగ్రాఫర్లకు అభివాదం చేసింది. రణ్‌బీర్ వారికి ఫ్లయింగ్ కిస్‌లు ఇస్తూ కనిపించగా, ఆలియా, నీతూ నవ్వుతూ పలకరించారు.