ప్రముఖ ఆరోగ్య బీమా సంస్థ 'స్టార్ హెల్త్ అండ్ అలైడ్ ఇన్సూరెన్స్‌'కు భారత బీమా నియంత్రణ, అభివృద్ధి ప్రాధికార సంస్థ భారీ జరిమానా విధించింది. హెల్త్ ఇన్సూరెన్స్ క్లెయిమ్‌ల పరిష్కారంలో నిబంధనలను ఉల్లంఘించినందుకు గాను రూ. 2 కోట్ల పెనాల్టీ విధిస్తూ నిర్ణయం తీసుకుంది. నిరాధారమైన కారణాలతో క్లెయిమ్‌లను తిరస్కరించడం, పాలసీ నిబంధనలకు విరుద్ధంగా కోతలు విధించడం వంటి తీవ్రమైన లోపాలను ఐఆర్‌డీఏఐ గుర్తించింది.

2022లో నిర్వహించిన తనిఖీల ఆధారంగా ఐఆర్‌డీఏఐ ఈ చర్యలు చేపట్టింది. ఈ వ్యవహారంలో 2024 డిసెంబర్‌లో షో-కాజ్ నోటీసు జారీ చేసి, 2025 జూన్‌లో విచారణ జరిపిన అనంతరం తుది ఆదేశాలను వెలువరించింది. కొవిడ్-19 క్లెయిమ్‌లు సహా అనేక బీమా క్లెయిమ్‌లను స్టార్ హెల్త్ అన్యాయంగా తిరస్కరించిందని నియంత్రణ సంస్థ తన ఉత్తర్వుల్లో పేర్కొంది. క్లెయిమ్‌ల తిరస్కరణకు లేదా కోతలకు గల కారణాలపై పాలసీదారులకు సరైన సమాచారం ఇవ్వలేదని, దీనివల్ల వారు సంస్థ నిర్ణయాన్ని సవాలు చేసే అవకాశాన్ని కోల్పోయారని స్పష్టం చేసింది.

క్లెయిమ్‌ల తిరస్కరణకు సంబంధించి రూ. కోటి, నిబంధనలకు విరుద్ధంగా కోతలు విధిస్తూ పారదర్శకత పాటించనందుకు మరో రూ. కోటి చొప్పున మొత్తం రూ. 2 కోట్ల జరిమానా విధించారు.

అంతేకాకుండా, నెట్‌వర్క్ ఆసుపత్రులతో కుదుర్చుకున్న ఒప్పందాల ప్రకారం లభించే రాయితీలను (డిస్కౌంట్లు) బిల్లుల్లో చూపించకపోవడంపై కూడా ఐఆర్‌డీఏఐ తీవ్రంగా స్పందించింది. క్లెయిమ్ సెటిల్‌మెంట్ లేఖలలో అనుమతించిన, తిరస్కరించిన, చెల్లించని మొత్తాలను విడివిడిగా, స్పష్టంగా పేర్కొనాలని ఆదేశించింది. సంస్థ చేపట్టిన దిద్దుబాటు చర్యలను పరిగణనలోకి తీసుకున్న ఐఆర్‌డీఏఐ, ఈ ఆదేశాలను బోర్డు ముందు ఉంచి, తీసుకున్న చర్యలపై నివేదిక సమర్పించాలని స్టార్ హెల్త్ యాజమాన్యాన్ని ఆదేశించింది.