గుజరాత్‌లోని వడ్నగర్‌లో వెలసిన చారిత్రక హట్కేశ్వర్ మహాదేవ్ ఆలయాన్ని వారణాసిలోని కాశీ విశ్వనాథ్ కారిడార్ తరహాలో అభివృద్ధి చేసి, 'గుజరాత్ కాశీ'గా తీర్చిదిద్దాలని కంచి కామకోటి పీఠాధిపతి జగద్గురు శంకర విజయేంద్ర సరస్వతి స్వామి పిలుపునిచ్చారు.

ప్రధాని నరేంద్ర మోదీ మార్గదర్శకత్వంలో కాశీ విశ్వనాథ ఆలయం ఏ విధంగానైతే అభివృద్ధి చెందిందో, అదే రీతిలో హట్కేశ్వర్ ఆలయాన్ని, దాని పరిసర ప్రాంతాలను సైతం విస్తరించాలని ఆయన సూచించారు. వివిధ ఆధ్యాత్మిక కార్యక్రమాల ద్వారా ఈ ఆలయ విశిష్టతను చాటిచెప్పాలని, వడ్నగర్‌ను గుజరాత్‌లో ఒక ప్రధాన ఆధ్యాత్మిక కేంద్రంగా తీర్చిదిద్దాలని ఆకాంక్షించారు. ఈ పవిత్ర క్షేత్రం అభివృద్ధికి సంబంధించిన ప్రత్యేక ప్రణాళికపై గుజరాత్ ముఖ్యమంత్రి భూపేంద్ర పటేల్‌తో ఇప్పటికే చర్చించినట్లు శంకరాచార్య వెల్లడించారు.

పట్టణ భౌతిక అభివృద్ధితో పాటు ఆధ్యాత్మిక వాతావరణం కూడా మెరుగుపడాలని, ఇందుకు స్థానిక ప్రజలు, కేంద్ర, రాష్ట్ర ప్రభుత్వాలు, భక్తులు సమన్వయంతో కృషి చేయాలని ఆయన ఆకాంక్షించారు. వడ్నగర్‌లోని హట్కేశ్వర్ ఆలయంలో నవంబర్ 11 నుంచి 20 వరకు పది రోజుల పాటు జరిగిన విశ్వశాంతి మహాయాగం ముగింపు సందర్భంగా స్వామీజీ ఈ వ్యాఖ్యలు చేశారు. లోక కల్యాణం, సామాజిక సామరస్యం కోసం నిర్వహించిన ఈ యాగంలో 144 మంది వేద పండితులు పాల్గొన్నారు.

ప్రధాని నరేంద్ర మోదీ స్వస్థలమైన వడ్నగర్‌లో ఉన్న హాట్కేశ్వర్ మహాదేవ్ ఆలయం 17వ శతాబ్దానికి చెందినది. ఇక్కడ శివుడు స్వయంభూ లింగ రూపంలో కొలువై ఉన్నాడు. ఈ యాగంలో లోక్‌సభ స్పీకర్ ఓం బిర్లా, గుజరాత్ ఉప ముఖ్యమంత్రి హర్ష్ సంఘ్వీ వంటి ప్రముఖులు పాల్గొని ప్రత్యేక పూజలు నిర్వహించారు.