అండర్‌వరల్డ్ డాన్, గ్లోబల్ టెర్రరిస్ట్ దావూద్ ఇబ్రహీం పాకిస్థాన్‌లోనే ఉన్నాడంటూ వస్తున్న వార్తలకు బలం చేకూర్చేలా ఓ మాజీ ఎఫ్‌బీఐ ఏజెంట్ సంచలన విషయాలు వెల్లడించారు. దావూద్ నెట్‌వర్క్‌లోకి తాను చొరబడ్డానని చెప్పుకుంటున్న పాకిస్థాన్ సంతతికి చెందిన కమ్రాన్ ఫరీదీ, 'ఆజ్ తక్' రేడియోకు ఇచ్చిన పాడ్‌కాస్ట్ ఇంటర్వ్యూలో దావూద్ జీవితానికి సంబంధించిన అనేక ఆసక్తికరమైన అంశాలను బయటపెట్టారు. దావూద్ ఇప్పటికీ కరాచీలోని క్లిఫ్టన్ ప్రాంతంలోనే చురుగ్గా ఉన్నాడని, భారత్-పాక్ ఉద్రిక్తతల నేపథ్యంలో తన నివాసాన్ని మార్చలేదని స్పష్టం చేశారు.

ఫరీదీ కథనం ప్రకారం.. దావూద్‌కు పాకిస్థాన్ స్పెషల్ సర్వీస్ గ్రూప్ (ఎస్ఎస్‌జీ)కు చెందిన 35 నుంచి 45 మంది కమాండోలు ఆటోమేటిక్ ఆయుధాలతో నిరంతరం భద్రత కల్పిస్తున్నారు. ఈ భద్రతా వ్యవహారాలను ఛోటా షకీల్ పర్యవేక్షిస్తాడని, ప్రతి శుక్రవారం ఐఎస్ఐ ప్రధాన కార్యాలయానికి వెళ్లి నివేదిక సమర్పిస్తాడని ఫరీదీ ఆరోపించారు. 

దావూద్, ఛోటా షకీల్ ఇద్దరూ దుబాయ్ నుంచి దిగుమతి చేసుకున్న ప్రత్యేక బుల్లెట్ ప్రూఫ్ వాహనాల్లో ప్రయాణిస్తారని, ఈ కార్లు బాంబులు, రాకెట్లు, స్నైపర్ దాడులను కూడా తట్టుకోగలవని వివరించారు. పాకిస్థాన్‌లో దావూద్‌ను 'ఐఎస్ఐ అతిథి'గా చూస్తారని, లష్కరే తోయిబా, హఫీజ్ సయీద్‌లతో అతనికి వ్యాపార సంబంధాలు కొనసాగుతున్నాయని తెలిపారు.

దావూద్ వ్యక్తిగత జీవితం గురించి కూడా ఫరీదీ పలు విషయాలు పంచుకున్నారు. అతను సాధారణంగా రాత్రి 10 గంటల తర్వాతే బయటకు వస్తాడని, తెల్లవారుజాము ప్రార్థనల కంటే ముందే ఇంటికి తిరిగి వెళ్తాడని చెప్పారు. బయటకు మతపరమైన వ్యక్తిగా కనిపించినప్పటికీ, కొకైన్ వాడతాడని, గతంలో మద్యం కూడా సేవించేవాడని, ముజ్రా ప్రదర్శనలకు హాజరవుతాడని ఆరోపించారు.

పాక్ అధికారులు, వ్యాపారవేత్తలతో సమావేశాల కోసం '22 జమ్‌జమా' అనే సౌండ్‌ప్రూఫ్ భవనాన్ని ఉపయోగిస్తాడని పేర్కొన్నారు. దావూద్‌కు తన కన్నా 20 ఏళ్లు చిన్నదైన 'ఆయేషా' అనే రెండో భార్య ఉందని, ఆమె తరచూ బ్లాక్ మెర్సిడెస్ కారులో కనిపిస్తుందని ఫరీదీ తెలిపారు.

2009లో రష్యన్ మాఫియా సభ్యుడిగా నమ్మించి దావూద్ నెట్‌వర్క్‌లోకి తాను ప్రవేశించినట్లు ఫరీదీ తెలిపారు. జబీర్ మోతీవాలా ద్వారా తనకు ఈ అవకాశం లభించిందని, హవాలా కార్యకలాపాలు ఏర్పాటు చేయడంలో వారికి సహాయం చేశానని అన్నారు. ఆ తర్వాత 2018లో లండన్‌లో మోతీవాలా అరెస్టుకు తానే పరోక్షంగా కారణమయ్యానని చెప్పుకొచ్చారు. సినిమాల్లో చూపించినట్లు దావూద్ వృద్ధాప్యంతో మంచాన పడలేదని, ఇప్పటికీ తన డ్రగ్స్ వ్యాపారంలో చురుగ్గా ఉన్నాడని ఫరీదీ స్పష్టం చేశారు.

అయితే, ఈ విషయాలన్నీ కమ్రాన్ ఫరీదీ చేసిన ఆరోపణలు మాత్రమేనని, వీటిని అధికారిక సంస్థలేవీ స్వతంత్రంగా ధ్రువీకరించలేదని గమనించాలి. 1993 ముంబై పేలుళ్ల కేసులో ప్రధాన నిందితుడైన దావూద్‌ను భారత్ వెతుకుతుండగా, ఐక్యరాజ్యసమితి అతన్ని గ్లోబల్ టెర్రరిస్ట్‌గా ప్రకటించిన విషయం తెలిసిందే.

వీడియో కోసం ఇక్క‌డ క్లిక్ చేయండి