ధనుష్, మలయాళ మెగాస్టార్ మమ్ముట్టి ప్రధాన పాత్రల్లో నటించిన క్రైమ్ యాక్షన్ ఎంటర్‌టైనర్ చిత్రం 'ఓం' విడుదలకు సిద్ధమైంది. దర్శకుడు రాజ్ కుమార్ పెరియసామి తెరకెక్కించిన ఈ చిత్రానికి సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) సెన్సార్ ప్రక్రియను పూర్తి చేసి, 'యూ/ఏ' (U/A) సర్టిఫికెట్ జారీ చేసింది. ఈ విషయాన్ని నిర్మాణ సంస్థల్లో ఒకటైన వండర్‌బార్ ఫిల్మ్స్ సోషల్ మీడియా వేదికగా అధికారికంగా వెల్లడించింది. పూర్తి స్థాయి యాక్షన్, ఉత్కంఠభరిత కథనంతో రూపొందిన ఈ సినిమా నవంబర్ 20న థియేటర్లలో విడుదల కానుంది.

ఇటీవల విడుదలైన ట్రైలర్‌తో ఈ సినిమాపై ప్రేక్షకుల్లో భారీ అంచనాలు ఏర్పడ్డాయి. కొన్ని యథార్థ సంఘటనల ఆధారంగా రెండు పుణ్యక్షేత్రాల మధ్య జరిగే ఎర్రచందనం అక్రమ రవాణా నేపథ్యంలో కథ నడుస్తుంది. ప్రకృతిపై జరిగే నేరాలను అరికట్టేందుకు ఆంధ్రప్రదేశ్ పోలీస్ శాఖ ఏర్పాటు చేసిన స్పెషల్ టాస్క్ ఫోర్స్ (STF) విభాగానికి ఐపీఎస్ అధికారి నిత్యారెడ్డి నాయకత్వం వహిస్తారు. ఈ పాత్రలో సాయిపల్లవి నటించారు. స్మగ్లింగ్ నెట్‌వర్క్‌ను కూకటివేళ్లతో పెకిలించేందుకు ఆమె చేపట్టే రహస్య ఆపరేషన్‌కు 'ఆపరేషన్ మోల్' (OM) అనే కోడ్ నేమ్ నిర్ణయిస్తారు.

మరోవైపు తమిళనాడు పోలీస్ శాఖకు చెందిన ఆర్గనైజ్డ్ క్రైమ్ ఇంటెలిజెన్స్ యూనిట్ (OCIU) విభాగంలో పనిచేసే సభ్యుడిగా ధనుష్ 'D 402' పాత్రలో కనిపించనున్నారు. బయటి ప్రపంచానికి తెలియకుండా రహస్యంగా ఉంచిన భార్య, బిడ్డలతో జీవించే సాధారణ వ్యక్తిగా కూడా ఆయన పాత్రలో మరో కోణం ఉండనుంది. ధనుష్ భార్య రోజా పాత్రలో శ్రీలీల నటించారు. ఇక ఈ కథలో ప్రధాన ఆకర్షణగా నిలిచే కీలకమైన విలన్ పాత్రను మమ్ముట్టి పోషించారు. వ్యవస్థీకృత నేర సామ్రాజ్యాన్ని నడిపే 'రెడ్ హిల్స్ కార్తికేయన్' అనే శక్తిమంతమైన ప్రతినాయకుడి పాత్రలో ఆయన కనిపించనున్నారు. ధనుష్, మమ్ముట్టి కాంబినేషన్‌లో వస్తున్న మొదటి చిత్రం ఇదే కావడం విశేషం.

నిజానికి 'ఓం' సినిమా అక్టోబర్ 16నే విడుదల కావాల్సి ఉంది. అయితే సూపర్ స్టార్ రజనీకాంత్ నటించిన 'జైలర్ 2' అక్టోబర్ 15న విడుదలైన నేపథ్యంలో, ఆయనపై ఉన్న గౌరవంతో రిలీజ్‌ను వాయిదా వేస్తున్నట్లు ధనుష్ గతంలో స్వయంగా ప్రకటించారు. ఆ తర్వాత దీపావళి బరిలో సూర్య సినిమా ఉండటంతో, పోటీ లేకుండా నవంబర్ 20న సినిమాను విడుదల చేయాలని నిర్ణయించారు.

ఈ చిత్రంలో బాలీవుడ్ దిగ్గజ నటుడు నసీరుద్దీన్ షా కూడా ఒక ప్రత్యేక పాత్రలో కనిపించనున్నారు. 'ఓం' టైటిల్‌కు 'చాప్టర్ 1' అనే ట్యాగ్‌లైన్ జోడించడంతో, ఈ కథకు సీక్వెల్ కూడా ఉండవచ్చని తెలుస్తోంది. ధనుష్ కెరీర్‌లోనే అత్యంత భారీ బడ్జెట్‌తో తెరకెక్కిన ఈ చిత్రం, ఆయన అభిమానులు కోరుకునే వింటేజ్ మాస్ ఎలిమెంట్స్‌తో అలరిస్తుందని చిత్ర యూనిట్ ధీమా వ్యక్తం చేసింది. ఈ చిత్రానికి సాయి అభ్యంకర్ సంగీతం అందించగా, ఎజిల్ అరసు సినిమాటోగ్రఫీ బాధ్యతలు నిర్వహించారు.
20261117fr5f73e5f9bcbb.jpg