కోలీవుడ్ స్టార్ హీరో ధనుష్ కథానాయకుడిగా తెరకెక్కిన తాజా చిత్రం 'ఓం' ప్రీ రిలీజ్ వేడుక హైదరాబాద్ లోని జేఆర్సీ కన్వెన్షన్ లో ఘనంగా జరిగింది. ఈ కార్యక్రమంలో ప్రముఖ నటి రేణూ దేశాయ్ తన కుమార్తె ఆద్యతో కలిసి ప్రత్యేక ఆకర్షణగా నిలిచారు. వేదికపై మాట్లాడిన ఆమె, చిత్రంలో తన పాత్ర, షూటింగ్ అనుభవాలు మరియు తోటి నటీనటులతో పనిచేసిన జ్ఞాపకాలను పంచుకుంటూ భావోద్వేగానికి లోనయ్యారు.

ఈ సందర్భంగా రేణూ దేశాయ్ మాట్లాడుతూ.. ఈ ప్రాజెక్ట్‌లోకి తాను ఎలా వచ్చానో వివరించారు. "ఫిబ్రవరిలో మహాశివరాత్రి పర్వదినాన నేను కామాఖ్య అమ్మవారి దర్శనంలో ఉన్నప్పుడు ఈ సినిమా కోసం కాల్ వచ్చింది. మహాశివరాత్రి, కామాఖ్య క్షేత్రం, ఆపై సినిమా పేరు 'ఓం' కావడం.. ఇవన్నీ ఒక దైవిక సంకల్పంలా అనిపించాయి. నన్ను కలవకుండా, ఎలాంటి లుక్ టెస్ట్ కూడా చేయకుండా దర్శకుడు రాజ్‌కుమార్ సర్ నాపై నమ్మకంతో ఈ పాత్రకు ఎంపిక చేశారు. ఈ రోజు ఆయన ఇక్కడ లేకపోవడం లోటుగా ఉంది, ఆయన నమ్మకానికి ధన్యవాదాలు" అని తెలిపారు.

తోటి నటీనటుల గురించి ప్రస్తావిస్తూ.. సాయి పల్లవితో కలిసి నటించే సన్నివేశాలు లేకపోవడం కొంత నిరాశ కలిగించినా, శ్రీలీలతో కలిసి చేసిన సీన్లు చాలా బాగా వచ్చాయని రేణూ దేశాయ్ పేర్కొన్నారు. హీరో ధనుష్‌పై స్పందిస్తూ, "షూటింగ్ సమయంలో తమిళ భాష సరిగా రాక నేను చేసిన తప్పులను ఓపికగా భరించినందుకు ధనుష్ గారికి ప్రత్యేక ధన్యవాదాలు" అని చెప్పారు.

మలయాళ మెగాస్టార్ మమ్ముట్టితో కలిసి పనిచేయడంపై ఆమె అత్యంత వినమ్రంగా మాట్లాడారు. "45 ఏళ్ల వయసులో జీవితంలో అన్నీ చూసేశానని అనుకున్నాను. కానీ మమ్ముట్టి సార్‌తో పనిచేసే వరకు అసలైన స్థాయి ఏంటో నాకు తెలియదు. ఆయన అద్భుతమైన వ్యక్తిత్వం, నటనా నైపుణ్యం ముందు నిలబడి మాట్లాడటానికే నాకు భయమేసింది. ఆయన నటనను వర్ణించడానికి నా వద్ద పదాలు సరిపోవు. అలాంటి లెజెండరీ నటుడితో స్క్రీన్ షేర్ చేసుకోవడం నా అదృష్టం. సెట్‌లో ఆయన నన్ను ఎంతో సౌకర్యవంతంగా చూసుకున్నారు" అని ప్రశంసించారు.

చివరగా నిర్మాణ సంస్థ వండర్‌బార్ ఫిల్మ్స్, నిర్మాతలు మరియు చిత్ర బృందానికి కృతజ్ఞతలు తెలిపిన రేణూ దేశాయ్, ఈ నెల 23న థియేటర్లలోకి వస్తున్న 'ఓం' సినిమాను ప్రేక్షకులు పెద్ద సంఖ్యలో చూసి ఆదరించాలని, తన నటన ఎలా ఉందో చూసి చెప్పాలని కోరారు.
.
Play video