న్యూజిలాండ్‌తో జరగనున్న తొలి టెస్టు మ్యాచ్‌లో టీమిండియా పక్కా వ్యూహంతో బరిలోకి దిగనుంది. ఏడుగురు బ్యాటర్లు, నలుగురు ఫాస్ట్ బౌలర్ల కూర్పుతో ఆడనున్నట్లు కెప్టెన్ శుభ్‌మన్ గిల్ మీడియా సమావేశంలో స్పష్టం చేశాడు. ఇప్పటికే పరిమిత ఓవర్ల సిరీస్‌లను గెలుచుకున్న భారత్, టెస్టు సిరీస్‌ను కూడా కైవసం చేసుకుని పర్యటనలో హ్యాట్రిక్ విజయాలు నమోదు చేయాలని లక్ష్యంగా పెట్టుకుంది. రేప‌టి నుంచి బేసిన్ రిజర్వ్ వేదికగా ఈ తొలి టెస్టు ప్రారంభం కానుంది.

ఈ సందర్భంగా గిల్ మాట్లాడుతూ.. "మేం కచ్చితంగా నలుగురు ఫాస్ట్ బౌలర్లతోనే ఆడతాం. మా పేసర్లందరూ అద్భుతంగా రాణిస్తున్నారు. ఇది మాకు క‌లిసొచ్చే అంశం. తుది జట్టు కూర్పుపై ఇంకా చర్చిస్తున్నాం" అని తెలిపాడు. పిచ్ మూడో రోజు నుంచి ఫ్లాట్‌గా మారే అవకాశం ఉందని, బంతి పాతబడిన తర్వాత కూడా బలంగా బౌలింగ్ చేయగల పేసర్లు అవసరమని గిల్ అభిప్రాయపడ్డాడు. జస్‌ప్రీత్ బుమ్రా పేస్ విభాగానికి నాయకత్వం వహించనుండగా, మహమ్మద్ సిరాజ్, ఆకాశ్ దీప్, ప్రసిద్ధ్ కృష్ణ తుది జట్టులో స్థానం కోసం పోటీ పడుతున్నారు.

వికెట్ కీపర్-బ్యాటర్ రిషభ్ పంత్ ఫిట్‌నెస్, ఫామ్‌పై వస్తున్న ఆందోళనలను గిల్ కొట్టిపారేశాడు. "పంత్ జట్టులో అత్యంత అనుభవజ్ఞుడైన, సీనియర్ ఆటగాళ్లలో ఒకడు. అతను ప్రపంచవ్యాప్తంగా సెంచరీలు సాధించాడు. ఆస్ట్రేలియా, దక్షిణాఫ్రికా వంటి దేశాల్లో శతకాలు చేశాడు. న్యూజిలాండ్‌లో కూడా ఆ ఘనత సాధించాలని అతను ఎదురుచూస్తున్నాడు" అని గిల్ ప్రశంసించాడు. పంత్ జట్టుకు ఎంతో నాణ్యతను తీసుకొస్తాడని, అతని అనుభవం కీలకమని పేర్కొన్నాడు.

అయితే, పంత్ రాకతో తుది జట్టు ఎంపిక యాజమాన్యానికి సవాలుగా మారింది. ఇండియా-ఎ తరఫున శతకంతో రాణించిన మరో వికెట్ కీపర్-బ్యాటర్ ధ్రువ్ జురెల్ కూడా తుది జట్టులో స్థానం కోసం గట్టిగా పోటీ పడుతున్నాడు. వీరితో పాటు టాప్-ఆర్డర్ బ్యాటర్లు బి. సాయి సుదర్శన్, దేవదత్ పడిక్కల్ కూడా ఇండియా-ఎ సిరీస్‌లో అద్భుత ప్రదర్శన చేసి తమ వంతు పోటీ ఇస్తున్నారు. స్పిన్నర్ కుల్దీప్ యాదవ్‌ను దేశవాళీ క్రికెట్ ఆడేందుకు వీలుగా జట్టు నుంచి విడుదల చేశారు.