ఇండియన్ ప్రీమియర్ లీగ్ (ఐపీఎల్) 2027 మినీ వేలానికి సమయం దగ్గర పడుతున్న తరుణంలో టీమిండియా వెటరన్ స్పిన్నర్ రవిచంద్రన్ అశ్విన్ చేసిన వ్యాఖ్యలు క్రికెట్ వర్గాల్లో ఆసక్తికర చర్చకు దారితీశాయి. చెన్నై సూపర్ కింగ్స్ (సీఎస్కే) మహేంద్ర సింగ్ ధోనీని వేలానికి ముందు విడుదల చేయాలని, ఒకవేళ అతను ఆడకూడదని నిర్ణయించుకుంటే ఈ నిర్ణయం తీసుకోవడం ఉత్తమమని అశ్విన్ సూచించాడు. దీనివల్ల ఫ్రాంచైజీకి వేలం పర్స్‌లో రూ.4 కోట్లు ఆదా అవుతాయని తన యూట్యూబ్ ఛానెల్‌లో విశ్లేషించాడు.

ధోనీని ఒక 'ఆసక్తికరమైన రిలీజ్ ఆప్షన్'గా అభివర్ణించిన అశ్విన్, గాయం కారణంగా 2026 సీజన్‌లో ఒక్క మ్యాచ్ కూడా ఆడలేదనే విషయాన్ని గుర్తు చేశాడు. "సీఎస్కే రాహుల్ చాహర్‌ను, ప్రశాంత్ వీర్‌ను విడుదల చేస్తుంది. అయితే, ఎంఎస్ ధోనీ సంగతేంటి? అతనూ ఒక మంచి రిలీజ్ ఆప్షన్. అతను ఆడనప్పుడు, జట్టులో మెంటార్ లేదా కోచ్ వంటి పాత్రను చేపట్టవచ్చు. దీనివల్ల జట్టుకు అదనంగా రూ.4 కోట్లు వేలంలో ఖర్చు చేయడానికి అందుబాటులో ఉంటాయి. నిజంగా అతను ఆడకపోతే, ఆ రూ.4 కోట్లను ఒక లాభంగా పరిగణించవచ్చు" అని అశ్విన్ వివరించాడు.

ధోనీతో పాటు మాథ్యూ షార్ట్, కార్తీక్ శర్మ వంటి ఆటగాళ్లను కూడా సీఎస్కే విడుదల చేసే అవకాశం ఉందని అశ్విన్ అంచనా వేశాడు. ఈ ఆటగాళ్లందరినీ వదిలేస్తే, ఐపీఎల్ 2027 మినీ వేలంలో సీఎస్కే సుమారు రూ.40 నుంచి రూ.45 కోట్ల పర్స్‌తో బరిలోకి దిగొచ్చని అభిప్రాయపడ్డాడు. కార్తీక్ శర్మ 2026లో బాగానే రాణించినప్పటికీ, అతని స్థానంలో శివమ్ దూబే లేదా డెవాల్డ్ బ్రెవిస్ వంటి ప్రత్యామ్నాయాలను చూడవచ్చని లేదా తక్కువ ధరకు తిరిగి కొనుగోలు చేసే ప్రయత్నం చేయవచ్చని పేర్కొన్నాడు.

ప్రస్తుతం ధోనీ భవిష్యత్తుపై స్పష్టత లేదు. గాయం నుంచి కోలుకున్నాక, వైద్య పరీక్షల తర్వాతే తన ఆటకు సంబంధించి తుది నిర్ణయం తీసుకుంటానని అతను గతంలోనే సూచించాడు. ఇవాళ్టితో ఆటగాళ్ల రిటెన్షన్ గడువు ముగియనుండగా, డిసెంబర్‌లో మినీ వేలం జరగనుంది. 

ఇదే సమయంలో దీపక్ చాహర్, ట్రెంట్ బౌల్ట్, షారుఖ్ ఖాన్, మతీశ పతిరన, కామెరాన్ గ్రీన్ వంటి ఇతర ఫ్రాంచైజీల స్టార్ ఆటగాళ్లు కూడా వేలంలోకి వచ్చే అవకాశం ఉందని అశ్విన్ అంచనా వేశాడు. ధోనీని సీఎస్కే యాజమాన్యం రూ.4 కోట్లకు రిటైన్ చేసుకున్న నేపథ్యంలో అశ్విన్ వ్యాఖ్యలు ఫ్యాన్స్‌లో కొత్త ఉత్కంఠను రేపుతున్నాయి.