టీపీసీసీ మీడియా ప్యానలిస్టులు, కోఆర్డినేటర్లు, అధికార ప్రతినిధుల నియామకాల నిలిపివేత వ్యవహారంపై భువనగిరి ఎంపీ, టీపీసీసీ మీడియా అండ్ పబ్లిసిటీ వింగ్ ఛైర్మన్ చామల కిరణ్ కుమార్ రెడ్డి స్పష్టతనిచ్చారు. టీపీసీసీ అధ్యక్షుడు మహేశ్ కుమార్ గౌడ్‌తో తనకు ఎలాంటి విభేదాలు లేవని, ఇద్దరూ చర్చించుకునే ఈ జాబితాను సిద్ధం చేశామని ఆయన స్పష్టం చేశారు.

ఇటీవల మీడియా వింగ్‌కు సంబంధించి 20 మందితో కూడిన ప్యానలిస్టులు, సమన్వయకర్తలు, అధికార ప్రతినిధుల జాబితాను ఎంపీ చామల విడుదల చేశారు. అయితే, తదుపరి ఆదేశాలు వచ్చే వరకు ఈ నియామక ఉత్తర్వులను నిలిపివేస్తున్నట్లు తెలంగాణ కాంగ్రెస్ తన అధికారిక ‘ఎక్స్’ ఖాతా ద్వారా ప్రకటించింది. దీంతో పార్టీ వర్గాల్లో ఈ అంశం తీవ్ర గందరగోళానికి దారితీసింది.

ఈ పరిణామాలపై చామల స్పందిస్తూ వివరాలు వెల్లడించారు. ఒక చిన్న సాంకేతిక సమస్య తలెత్తడం వల్లే ప్రస్తుతానికి ఆ జాబితాను ఆపాల్సి వచ్చిందని, అంతేకానీ కమిటీని పూర్తిగా రద్దు చేయలేదని వివరించారు. ఎవరూ ఆందోళన చెందాల్సిన అవసరం లేదని, జాబితాలో మరికొన్ని పేర్లను చేర్చి, మరింత సమగ్రమైన కొత్త జాబితాను త్వరలోనే అధికారికంగా విడుదల చేస్తామని ఆయన తెలిపారు.