పగలంతా కష్టపడి కూలి పని చేయడం, వచ్చిన డబ్బుతో కుటుంబాన్ని పోషించడం చాలామంది చేసే పని. కానీ, మధ్యప్రదేశ్‌కు చెందిన ఓ సామాన్యుడు మాత్రం తన రోజువారీ కష్టంతో పాటు మరో గొప్ప బాధ్యతను కూడా నిర్వర్తిస్తున్నాడు. గడిచిన ఏడేళ్లుగా దాదాపు 300 మూగజీవాల ఆకలి తీరుస్తూ మానవత్వానికి నిలువుటద్దంలా నిలుస్తున్నాడు.

వివరాల్లోకి వెళితే.. మధ్యప్రదేశ్‌లోని సెహోర్ జిల్లా, భైరుంద పట్టణానికి చెందిన గౌతమ్ యాదవ్ వృత్తిరీత్యా ఓ రోజువారీ కూలీ. ప్రతిరోజూ సాయంత్రం తన పని ముగించుకున్న తర్వాత ఒక తోపుడు బండి తీసుకుని వీధుల్లోకి బయలుదేరతాడు. బజరంగ్ బలి రోడ్ సహా పట్టణంలోని పలు ప్రాంతాల్లో ఇంటింటికీ తిరిగి మిగిలిపోయిన రొట్టెలను సేకరిస్తాడు. గత ఏడేళ్లుగా గౌతమ్ క్రమం తప్పకుండా ఈ పని చేస్తుండటంతో స్థానిక ప్రజలకు అతని దినచర్య బాగా అలవాటైంది. చాలామంది గౌతమ్ రాక కోసం ఎదురుచూసి, తాము తినగా మిగిలిన రొట్టెలను సిద్ధంగా ఉంచుతారు.

బండి నిండిన తర్వాత రోడ్ల పక్కన, ఖాళీ ప్రదేశాల్లో ఆకలితో ఎదురుచూసే ఆవులు, దూడలకు ఆ రొట్టెలను పంచుతాడు. గౌతమ్ పిలుపు వినగానే ఆవులు, దూడలు అతని చుట్టూ చేరతాయి. ఆయన చేతుల మీదుగా ఎంతో ప్రేమగా ఆహారం తింటాయి. జంతువులకు హాని కలగకూడదనే ఉద్దేశంతో రొట్టెలకు ఉన్న ప్లాస్టిక్ కవర్లను జాగ్రత్తగా తొలగించిన తర్వాతే వాటికి ఆహారం అందిస్తాడు.

తన ఆర్థిక పరిస్థితి అంతంత మాత్రమే అయినప్పటికీ, గౌతమ్ యాదవ్ ఒక్కరోజు కూడా తన సేవను ఆపలేదు. ఆయన నిస్వార్థ సేవకు సంబంధించిన వీడియోలు సోషల్ మీడియాలో వైరల్ కావడంతో పలువురు ప్రశంసలు కురిపిస్తున్నారు. గౌతమ్ చొరవకు స్థానిక ప్రజలు కూడా మద్దతుగా నిలుస్తుండటంతో ఆ ప్రాంతంలోని మూగజీవాలకు ప్రతిరోజూ సురక్షితమైన ఆహారం అందుతోంది. ఎలాంటి ప్రచార ఆర్భాటం లేకుండా కేవలం జంతు ప్రేమతో గౌతమ్ చేస్తున్న ఈ కృషి ఎందరికో ఆదర్శంగా నిలుస్తోంది.