అంతరిక్ష పరిశోధనల్లో చైనా మరో చారిత్రాత్మక మైలురాయిని అధిగమించింది. తమ తియాంగాంగ్ అంతరిక్ష కేంద్రంలో పనిచేస్తున్న చైనా శాస్త్రవేత్తలు, ఇప్పటివరకు ప్రపంచంలో ఎవరూ సాధించని అత్యంత శీతల ఉష్ణోగ్రతను సృష్టించి రికార్డు నెలకొల్పారు. ఈ ప్రయోగంలో 9.7 పికోకెల్విన్ల ఉష్ణోగ్రతను నమోదు చేసినట్లు వారు ప్రకటించారు. ఈ ఫలితాల వివరాలను ప్రతిష్ఠాత్మక 'సైన్స్' జర్నల్‌లో ప్రచురించారు.

పెకింగ్ యూనివర్సిటీ, చైనీస్ అకాడమీ ఆఫ్ సైన్సెస్‌కు చెందిన శాస్త్రవేత్తల బృందం ఈ అసాధారణ ప్రయోగాన్ని నిర్వహించింది. ఇందుకోసం వారు సుమారు 20,000 రుబీడియం-87 అణువులతో కూడిన బోస్-ఐన్‌స్టీన్ కండెన్‌సేట్‌ను ఉపయోగించారు. అంతరిక్ష కేంద్రంలోని మైక్రోగ్రావిటీ (సూక్ష్మ గురుత్వాకర్షణ) వాతావరణంలో ఈ అణువులను లేజర్ ట్రాప్‌లు, ఇతర శీతలీకరణ పద్ధతుల ద్వారా అత్యంత చల్లగా మార్చారు. అనంతరం ఆ అణువుల సమూహాన్ని ఏడు సెకన్ల పాటు పరిశీలించి, దాని విస్తరణ వేగాన్ని బట్టి ఉష్ణోగ్రతను లెక్కించారు. ఈ ఉష్ణోగ్రత 9.7 పికోకెల్విన్లు (0.0000000000097 కెల్విన్లు)గా తేలింది.

ఈ ఉష్ణోగ్రత ఎంత తక్కువంటే, విశ్వం సగటు ఉష్ణోగ్రత అయిన 2.7 కెల్విన్లతో పోలిస్తే ఇది దాదాపు 280 బిలియన్ రెట్లు చల్లనిది. ఇంతకుముందు 2021లో జర్మనీలో ఫ్రీ-ఫాల్ ప్రయోగంలో 38 పికోకెల్విన్ల ఉష్ణోగ్రతను నమోదు చేయగా, ఇప్పుడు డ్రాగ‌న్ కంట్రీ ఆ రికార్డును బద్దలుకొట్టింది. భూమిపై గురుత్వాకర్షణ కారణంగా ఇలాంటి ప్రయోగాలు చేయడం చాలా కష్టం. అణువులు వేగంగా కిందకు పడిపోవడంతో వాటిని ఎక్కువసేపు పరిశీలించడం సాధ్యం కాదు. కానీ, అంతరిక్షంలోని మైక్రోగ్రావిటీ వాతావరణం ఈ సమస్యను అధిగమించేందుకు వీలు కల్పించింది.

అతి శీతల పదార్థాలను నియంత్రించడంలో తాము సాధించిన పురోగతికి ఈ ప్రయోగం నిదర్శనమని శాస్త్రవేత్తలు తెలిపారు. ఈ విజయం భవిష్యత్తులో మరింత కచ్చితమైన క్వాంటం సెన్సార్ల తయారీకి, అంతరిక్షంలో ప్రాథమిక భౌతిక శాస్త్ర అధ్యయనాలకు మార్గం సుగమం చేస్తుందని పరిశోధకులు భావిస్తున్నారు.