జీవితంలో ఏం కావాలో అర్థం కావడం లేదా? ఈ 5 ప్రశ్నలు మీకు దారి చూపుతాయి

జీవితంలో కొన్ని సందర్భాల్లో మనకే మనపై ఓ సందేహం వస్తుంది. ‘ఇక ఏం చేయాలి?’ అనే ప్రశ్న కంటే.. ‘నాకు నిజంగా ఏం కావాలి?’ అనేదే పెద్ద ప్రశ్నగా మారుతుంది. మంచి ఉద్యోగం, ఎక్కువ డబ్బు, మంచి సంబంధం, పెద్ద ఇల్లు, గుర్తింపు.. ఇలా ఎన్నో లక్ష్యాల వెంట పరుగులు తీస్తుంటాం. వాటిలో కొన్ని సాధించినా ఏదో లోటుగా అనిపించొచ్చు. అసలు సమస్య జీవితం తప్పుదారిలో వెళ్లడం కాకపోవచ్చు. మనం ఎక్కడికి వెళ్లాలనుకుంటున్నామో ఆలోచించడానికి సమయం ఇవ్వకపోవడమే కావొచ్చు. మనకు నిజంగా ఏం కావాలో తెలుసుకోవడానికి ఈ 5 ప్రశ్నలు వేసుకోండి.

ఎవరూ తీర్పు చెప్పరని తెలిస్తే.. ఏం ఎంచుకుంటారు?
మన నిర్ణయాల వెనుక చాలాసార్లు ఇతరుల అభిప్రాయాలు ఉంటాయి. తల్లిదండ్రులు ఏమనుకుంటారు? స్నేహితులు ఏమంటారు? సమాజం ముందు మన ఎంపిక ఎలా కనిపిస్తుంది? ఇలా ఆలోచిస్తూ మనకు నచ్చినదేంటో మర్చిపోతాం. ఒక్కసారి ఎవరూ మీ నిర్ణయాన్ని ప్రశ్నించరని ఊహించుకోండి. ఎవరి ఆమోదం అవసరం లేదనుకోండి. అప్పుడు మీరు ఏం ఎంచుకుంటారు? ఆ మొదటి నిజాయతీ సమాధానం మీకు మీ గురించి చాలా చెప్పొచ్చు.

మీకు నచ్చే సాధారణ రోజు ఎలా ఉండాలి?
మన కలల జీవితాన్ని ఊహించుకుంటే పెద్ద విజయాలే గుర్తొస్తాయి. విదేశీ పర్యటన, ప్రమోషన్‌, సొంత ఇల్లు, మంచి సంబంధం.. కానీ జీవితంలో ఎక్కువ భాగం సాధారణ రోజులే. ఉదయం లేవడం, పని చేయడం, భోజనం, మాట్లాడటం, సాయంత్రం ఇంటికి రావడం.. ఇవే ఎక్కువ. అందుకే ‘నా కలల జీవితం ఎలా ఉండాలి?’ అని కాకుండా.. ‘సాధారణంగా ఒకరోజు నేను ఎలా ఉండాలనుకుంటున్నాను?’ అని ఆలోచించండి. ప్రశాంతత కావాలా? స్వేచ్ఛ కావాలా? చుట్టూ ఎక్కువ మంది ఉండాలా? సృజనాత్మకంగా గడపాలా? ఈ సమాధానాలు మీ అసలు కోరికలను బయటపెడతాయి.

ఏం కావాలని నటిస్తున్నాను?
ఈ ప్రశ్నకు సమాధానం చెప్పడం కాస్త ఇబ్బందిగా ఉండొచ్చు. ఎందుకంటే ఇది మనం ఏళ్లుగా నమ్ముతున్న కొన్ని విషయాలను మార్చేయొచ్చు. పేరొస్తుందని ఓ ఉద్యోగాన్ని కొనసాగిస్తూ ఉండొచ్చు. బిజీగా ఉండటమే విజయమని భావిస్తూ ఉండొచ్చు. చాలా కాలం క్రితం పెట్టుకున్న లక్ష్యాన్ని ఇప్పటికీ వదలలేకపోవచ్చు. కానీ గతంలో కోరుకున్న ప్రతి విషయం ఇప్పటికీ మనకు కావాల్సినదే అయుండాల్సిన అవసరం లేదు. మనకు ఇక వద్దనిపిస్తున్న విషయాలను గుర్తించడం కూడా.. మనకు ఏం కావాలో తెలుసుకునే తొలి అడుగు.

చివరిసారిగా ఎప్పుడు మీలాగే మీరు అనిపించారు?
మీరు మీ గురించి ఎలాంటి ఆందోళన లేకుండా హాయిగా ఉన్న ఓ సమయాన్ని గుర్తు చేసుకోండి. అది తప్పనిసరిగా సంతోషంగా ఉన్న కాలమే కావాల్సిన అవసరం లేదు. ఒంటరిగా ప్రయాణం చేసినప్పుడు కావచ్చు. కొందరు ఇష్టమైన వ్యక్తులతో ఉన్నప్పుడు కావచ్చు. ఏదైనా కొత్తది సృష్టించినప్పుడు కావచ్చు. ఎవరికైనా సాయం చేసినప్పుడు కావచ్చు. అప్పుడు మీరు ఏం చేస్తున్నారు? ఎవరితో ఉన్నారు? ఇతర విషయాలకు అంత ప్రాధాన్యం ఇవ్వలేదు? ఈ సమాధానాలు మీలో ఎప్పుడో పక్కకు వెళ్లిపోయిన కొన్ని కోణాలను మళ్లీ గుర్తు చేయొచ్చు.

ఏం అనుభవించాలనుకుంటున్నారు?
జీవితాన్ని ఎప్పుడూ మెరుగుపరుచుకోవాలనే ఆలోచనలోనే ఉంటే.. రోజూ ఏదో ఒకటి సరిచేయాల్సిన పనిలా అనిపిస్తుంది. తర్వాతి విజయం, జీతం పెంపు, పెద్ద మార్పు వచ్చిన తర్వాతే ప్రశాంతంగా ఉంటామని అనుకుంటాం. కానీ ముందుకు వెళ్లడానికి ప్రతిసారీ మరో పెద్ద లక్ష్యం అవసరం లేదు. ఏదైనా కొత్తది నేర్చుకోవచ్చు. ఇష్టమైన వ్యక్తితో ఎక్కువ సమయం గడపొచ్చు. ప్రయాణం చేయొచ్చు. ఏదైనా సృష్టించొచ్చు. విశ్రాంతి తీసుకోవచ్చు. జీవితంపై మళ్లీ ఆసక్తి పెంచుకోవచ్చు. ముందుకు వెళ్లేందుకు ఐదేళ్ల ప్రణాళిక ఎప్పుడూ అవసరం లేదు. తర్వాత ఏం అనుభవించాలనుకుంటున్నారో తెలుసుకోవడం కూడా ఓ మంచి ప్రారంభమే.