ప్రముఖ యోగా గురువు బాబా రాందేవ్‌ నేటి తరం యువత, ముఖ్యంగా జెన్-జీ (Gen Z) ఫిట్‌నెస్‌పై దృష్టి సారించారు. యువతలో శారీరక శ్రమ, వ్యాయామంపై అవగాహన గణనీయంగా తగ్గుతోందని ఆయన ఆందోళన వ్యక్తం చేశారు. ఇంట్లోనే ఉంటూ ఎలాంటి ఖర్చు లేకుండా శరీరాన్ని దృఢంగా, ఆరోగ్యంగా ఉంచుకోవడానికి ఐదు రకాల కీలకమైన బాడీవెయిట్ వ్యాయామాలను సూచించారు.

ఇటీవల విడుదల చేసిన ఒక వీడియోలో ఆయన మాట్లాడుతూ, యువత తప్పనిసరిగా శారీరక శ్రమలో పాల్గొనాలని పిలుపునిచ్చారు. సైక్లింగ్, రన్నింగ్, స్విమ్మింగ్ వంటి సాధారణ వ్యాయామాలతో పాటు, కొన్ని ప్రత్యేకమైన ఆసనాలు, కసరత్తులు చేయడం ద్వారా పూర్తిస్థాయి ఫిట్‌నెస్ సాధించవచ్చని తెలిపారు.

ఇవి శరీరాన్ని బలోపేతం చేయడమే కాకుండా, మానసిక ఒత్తిడిని కూడా తగ్గిస్తాయని వివరించారు. ఆయన సూచించిన ఐదు ప్రధాన వ్యాయామాలు ఇవే.

1. సూర్య నమస్కారం: శ్వాసతో అనుసంధానమై చేసే 12 ఆసనాల సమాహారం ఇది. వేగంగా చేస్తే ఇది గుండెకు మంచి వ్యాయామంగా పనిచేస్తుంది. శరీరంలోని దాదాపు అన్ని ప్రధాన కండరాలకు ఇది మేలు చేస్తుంది.

2. బైఠక్ (హిందూ స్క్వాట్): దీనిని సాధారణంగా బస్కీలు లేదా గుంజీలు అని కూడా అంటారు. పాదాలను కొద్దిగా దూరంగా ఉంచి, మడమలు నేలపై ఆన్చి కిందికి కూర్చొని పైకి లేవడం ద్వారా కాళ్లు, తొడల కండరాలు బలపడతాయి.

3. స్కందాసనం (సైడ్ లంజ్): శరీరాన్ని ఒకవైపుకు వంచి, ఒక కాలును మడుస్తూ చేసే ఈ వ్యాయామం తుంటి, తొడల కండరాలకు ఎంతో మేలు చేస్తుంది. శరీర సమతుల్యతను కూడా మెరుగుపరుస్తుంది.

4. సాధారణ దండ్: ఇది సాధారణ పుష్-అప్ మాదిరిగా ఉంటుంది. ఛాతీ, భుజాలు, కోర్ కండరాలను బలోపేతం చేయడానికి ఇది ఒక అద్భుతమైన వ్యాయామం.

5. హనుమాన్ దండ్: ఇది కొంచెం క్లిష్టమైన, డైనమిక్ వ్యాయామం. అధోముఖ శ్వానాసనం, కోబ్రా పోజ్ వంటి భంగిమలను కలుపుతూ చేసే ఈ కసరత్తుతో శరీరం మొత్తం దృఢంగా, ఫ్లెక్సిబుల్‌గా మారుతుంది.

ఈ వ్యాయామాలను సరైన పద్ధతిలో క్రమం తప్పకుండా చేయడం వల్ల శరీరంలో శక్తి పెరగడం, శరీర భంగిమ మెరుగుపడటం, గుండె ఆరోగ్యం మెరుగుపడటం, ఒత్తిడి తగ్గడం వంటి ఎన్నో ప్రయోజనాలు ఉంటాయని బాబా రాందేవ్‌ స్పష్టం చేశారు.