ఉత్తరప్రదేశ్ రాజకీయాల్లో కీలక పరిణామం చోటుచేసుకుంది. 2027లో జరగనున్న యూపీ అసెంబ్లీ ఎన్నికల్లో ఎంఐఎం, ఆజాద్ సమాజ్ పార్టీ కలిసి సంయుక్తంగా పోటీ చేయనున్నాయి. లక్నోలో నిర్వహించిన సంయుక్త మీడియా సమావేశంలో ఎంఐఎం అధినేత అసదుద్దీన్ ఒవైసీ, ఆజాద్ సమాజ్ పార్టీ చీఫ్ చంద్రశేఖర్ ఆజాద్ ఈ మేరకు అధికారిక ప్రకటన చేశారు.

తమ కూటమికి 'సామాజిక్ పరివర్తన్ మోర్చా' అని పేరు పెట్టినట్లు నేతలు వెల్లడించారు. ఈ కొత్త కూటమి తరఫున ముఖ్యమంత్రి అభ్యర్థిగా చంద్రశేఖర్ ఆజాద్ పేరును ఒవైసీ ప్రతిపాదించారు. ఉత్తరప్రదేశ్‌లోని మొత్తం 403 అసెంబ్లీ స్థానాల్లోనూ తమ కూటమి అభ్యర్థులను బరిలోకి దించుతామని వారు స్పష్టం చేశారు. బీజేపీ మూడోసారి రాష్ట్రంలో అధికారంలోకి రాకుండా నిలువరించడమే తమ ప్రాథమిక లక్ష్యమని నేతలు తెలిపారు.

బీజేపీ, సమాజ్ వాదీ పార్టీలకు ప్రత్యామ్నాయంగా ఉంటూ దళితులు, ముస్లింలు, ఇతర వెనుకబడిన వర్గాల హక్కుల కోసం పనిచేస్తామని చెప్పారు. అధికారం చేపడితే 12వ తరగతి వరకు ఉచిత విద్య, మెరుగైన వైద్యం, యువతకు ఉపాధి కల్పిస్తామని చంద్రశేఖర్ ఆజాద్ పేర్కొన్నారు.

సీట్ల కేటాయింపు విషయంలో విభేదాలు రావడంతోనే విపక్ష ఇండియా కూటమిలో చేరలేదని ఒవైసీ స్పష్టం చేశారు. భవిష్యత్తులో భావసారూప్యత కలిగిన ఇతర పార్టీలను కూడా తమ మోర్చాలోకి ఆహ్వానిస్తామని కూటమి నేతలు వివరించారు. ఈ పరిణామంతో యూపీ ఎన్నికల బరిలో మరో కూటమి తెరపైకి వచ్చినట్లయింది.