కొత్త కారు కొనాలని చూస్తున్న వారికి మారుతి సుజుకి గుడ్‌న్యూస్ చెప్పింది. స్విఫ్ట్, డిజైర్ సీఎన్‌జీ మోడళ్లలో తొలిసారిగా ఏఎంటీ గేర్‌బాక్స్‌ను తీసుకొచ్చింది. ఫ్యాక్టరీలోనే అమర్చిన సీఎన్‌జీ యూనిట్ తో ఆటోమేటిక్ గేర్‌బాక్స్‌ను అందించడం మారుతి చరిత్రలో ఇదే తొలిసారి. స్విఫ్ట్ సీఎన్‌జీ ఏఎంటీ ప్రారంభ ధర రూ.7.92 లక్షలు కాగా.. డిజైర్ సీఎన్‌జీ ఏఎంటీ ధర రూ.8.53 లక్షలు. ఇవి ఎక్స్‌షోరూమ్ ప్రారంభ ధరలు.

సంబంధిత సీఎన్‌జీ మాన్యువల్ వేరియంట్లతో పోలిస్తే ఏఎంటీ మోడళ్ల ధర రూ.35 వేలు ఎక్కువ. స్విఫ్ట్ సీఎన్‌జీ ఏఎంటీను VXi, VXi(O), ZXi వేరియంట్లలో తీసుకొచ్చారు. డిజైర్ సీఎన్‌జీ ఏఎంటీ VXi, ZXi వేరియంట్లలో లభిస్తుంది. సీఎన్‌జీతో ఏఎంటీను అందిస్తున్న దేశంలో రెండో సంస్థగా మారుతి నిలిచింది. ఇప్పటికే టాటా మోటార్స్ ఈ కాంబినేషన్‌ను అందిస్తోంది.

స్విఫ్ట్, డిజైర్ సీఎన్‌జీ ఏఎంటీలో 1.2 లీటర్, మూడు సిలిండర్ల జెడ్‌12ఈ పెట్రోల్ ఇంజిన్ ఉంటుంది. సీఎన్‌జీ మోడ్‌లో ఇది 70 హెచ్‌పీ శక్తి, 102 ఎన్ఎం టార్క్ ఉత్పత్తి చేస్తుంది. 5-స్పీడ్ ఏఎంటీ గేర్‌బాక్స్‌తో ఇంజిన్‌ను జత చేశారు.

మైలేజీ విషయంలోనూ మారుతి ఆకట్టుకునే గణాంకాలను ప్రకటించింది. స్విఫ్ట్ సీఎన్‌జీ ఏఎంటీ లీటర్‌కు కాకుండా కిలోగ్రామ్ సీఎన్‌జీకి 35.34 కిలోమీటర్ల మైలేజీ ఇస్తుందని కంపెనీ చెబుతోంది. డిజైర్ సీఎన్‌జీ ఏఎంటీ 36.47 కిలోమీటర్లు ఇస్తుందని పేర్కొంది. మాన్యువల్ మోడళ్లతో పోలిస్తే ఇవి వరుసగా 2.49, 2.74 కిలోమీటర్లు ఎక్కువ.

సీఎన్‌జీ ట్యాంక్ అదనపు బరువును తట్టుకునేలా సస్పెన్షన్‌ను మార్చారు. సీఎన్‌జీ ఫ్యూయల్ లెవల్ ఇండికేటర్, పెట్రోల్- సీఎన్‌జీ మధ్య సులభంగా మారేందుకు ఫ్యూయల్ స్విచ్ కూడా ఉన్నాయి. అయితే 55 లీటర్ల సామర్థ్యం ఉన్న సింగిల్ సీఎన్‌జీ ట్యాంక్ కారణంగా బూట్ స్పేస్ కొంత పరిమితంగా ఉంటుంది.

ఇదే అప్‌డేట్‌లో భాగంగా బాలెనో సీఎన్‌జీ ఏఎంటీను కూడా మారుతి తీసుకొచ్చింది. దీని ప్రారంభ ఎక్స్‌షోరూమ్ ధర రూ.8.32 లక్షలు. ఆటోమేటిక్ డ్రైవింగ్ సౌకర్యంతో పాటు సీఎన్‌జీ తక్కువ రన్నింగ్ ఖర్చు, తక్కువ ఉద్గారాలను కలపడం తమ ‘ఆటో గ్రీన్ మిషన్’ లక్ష్యమని కంపెనీ తెలిపింది.