ఏడాదికి రూ.కోటి జీతం.. ఇలాంటి ఆఫర్‌ వస్తే ఎవరైనా ఎగిరి గంతేస్తారు. కానీ ఓ జెన్‌-జీ యువకుడు మాత్రం అంత భారీ ఆఫర్‌ను సింపుల్‌గా తిరస్కరించాడు. కారణం.. ఆ ఉద్యోగ వాతావరణం తనకు నచ్చలేదట. ‘టాక్సిక్‌ వర్క్‌ప్లేస్‌’లో పనిచేయడం కంటే తక్కువ జీతమైనా తనకు నచ్చిన పని చేసుకోవడమే మేలని నిర్ణయించుకున్నాడు.

మస్కాన్‌ అటార్‌ అనే మహిళ లింక్డిన్‌లో ఈ విషయాన్ని పంచుకున్నారు. తన స్నేహితుడు రూ.కోటి ప్యాకేజీ ఉన్న జాబ్‌ ఆఫర్‌ను వదులుకున్నట్లు ఆమె తెలిపారు. కెరీర్‌లో కీలక దశలో ఉన్న సమయంలో ఇంత భారీ మొత్తాన్ని వదులుకోవడం తనను ఆశ్చర్యపరిచిందని చెప్పారు.

మస్కాన్‌ కూడా గతంలో ఇలాంటి అవకాశాలను తిరస్కరించినట్లు తెలిపారు. అయితే 25 ఏళ్ల వయసులో మాత్రం ఇంత స్పష్టమైన నిర్ణయం తీసుకునేంత పరిణతి తనకు ఉండేది కాదని పేర్కొన్నారు. కుటుంబ బాధ్యతలు, చుట్టుపక్కల వారి ఒత్తిడి, జీవనశైలి ఆకాంక్షలు తనను ఆ ఉద్యోగం వైపు నడిపించి ఉండేవని చెప్పారు.

ఈ నిర్ణయం ప్రస్తుతం సోషల్‌ మీడియాలో చర్చకు దారితీసింది. కొందరు యువత డబ్బు కంటే మానసిక ప్రశాంతత, మంచి పని వాతావరణం, కెరీర్‌ ఎదుగుదలకు ప్రాధాన్యం ఇస్తున్నారని అభిప్రాయపడ్డారు.

అయితే అందరూ ఈ నిర్ణయాన్ని సమర్థించలేదు. మధ్యతరగతి కుటుంబాల వారికి రూ.కోటి జీతాన్ని వదులుకోవడం అంత సులభం కాదని పలువురు కామెంట్‌ చేశారు. ఆర్థిక భద్రత ఉన్నవారే ఇలాంటి నిర్ణయం తీసుకోగలరని మరికొందరు పేర్కొన్నారు.

మొత్తంగా ఈ ఘటన డబ్బు, ఉద్యోగ సంతృప్తి, మానసిక ప్రశాంతత మధ్య కొత్త తరం ఎలాంటి సమతుల్యత కోరుకుంటుందనే చర్చను మరోసారి ముందుకు తెచ్చింది.