మహారాష్ట్రలోని వసాయ్‌లో ఓ వివాహ వేడుక తీవ్ర ఘర్షణకు దారితీసింది. పెళ్లి ముగిసిన కొద్దిసేపటికే వధూవరుల కుటుంబ సభ్యులు ఒకరిపై ఒకరు దాడి చేసుకోవడంతో వివాదం పెద్దదైంది. ఈ ఘటనలో ఇరువర్గాలు పోలీసులకు పరస్పరం ఫిర్యాదులు చేసుకోవడం, చివరకు పోక్సో చట్టం కింద కేసు నమోదు కావడం తీవ్ర చర్చనీయాంశంగా మారింది.

వసాయ్‌లోని ఓ ఫంక్షన్ హాలులో ఆదివారం ఈ వివాహ వేడుక జరిగింది. పెళ్లి ముగిసిన అనంతరం ఇరు కుటుంబాల మధ్య మొదలైన చిన్నపాటి వాగ్వివాదం పెరిగి పెద్దదైంది. ఇది కాస్తా ముదిరి ఒకరినొకరు తోసుకోవడం, ప్లాస్టిక్ కుర్చీలు విసురుకోవడం వరకు వెళ్లింది. ఈ గొడవకు సంబంధించిన వీడియో సోషల్ మీడియాలో వైరల్ అయింది. కొందరు ఈ దాడిలో గాయపడగా, వారిని చికిత్స నిమిత్తం ఆసుపత్రికి తరలించారు. కట్నం విషయంలోనే ఈ వివాదం మొదలైనట్లు తెలుస్తోంది.

ఈ ఘటన తర్వాత ఇరు పక్షాల వారు మాణిక్‌పూర్ పోలీస్ స్టేషన్‌ను ఆశ్రయించారు. తమపై దాడి చేశారంటూ వరుడి కుటుంబ సభ్యులు ఫిర్యాదు చేయగా, వధువు కుటుంబం మరో అడుగు ముందుకేసి పోక్సో చట్టం కింద తీవ్రమైన ఆరోపణలతో కేసు నమోదు చేసింది.

రెండు వర్గాల నుంచి ఫిర్యాదులు స్వీకరించిన పోలీసులు, భారతీయ న్యాయ సంహిత కింద కేసులు నమోదు చేశారు. ఈ ఘటనకు సంబంధించి కొంతమందిని అదుపులోకి తీసుకుని విచారిస్తున్నట్లు వెల్లడించారు. వైరల్ అయిన వీడియో ఫుటేజీ ఆధారంగా దర్యాప్తు కొనసాగిస్తున్నట్లు పోలీసులు తెలిపారు.