ఢిల్లీ మాజీ ముఖ్యమంత్రి అరవింద్ కేజ్రీవాల్ అధికారిక నివాసమైన ఫ్లాగ్‌స్టాఫ్ రోడ్‌లోని వివాదాస్పద ‘శీష్ మహల్’ వచ్చే వారం నుంచి సాధారణ ప్రజల సందర్శనార్థం తెరుచుకోనుంది. ఈ విషయాన్ని ఢిల్లీ పీడబ్ల్యూడీ మంత్రి పర్వేశ్ వర్మ మంగళవారం ప్రకటించారు. గతంలో ఈ బంగ్లాను స్టేట్ గెస్ట్ హౌస్‌గా మార్చాలని కేబినెట్ నిర్ణయించినప్పటికీ, ఆ నిర్ణయాన్ని సవరిస్తూ ప్రజలందరూ చూసేలా పర్యాటక కేంద్రంగా మార్చాలని తాజాగా నిర్ణయించారు.

మొదటి విడతలో మీడియా ప్రతినిధులకు పర్యటన ఏర్పాటు చేస్తామని, ఆ తర్వాత సాధారణ ప్రజలను అనుమతిస్తామని పర్వేశ్ వర్మ వెల్లడించారు. టిక్కెట్ల బుకింగ్, రిజర్వేషన్లకు సంబంధించిన పూర్తి వివరాలను త్వరలోనే ప్రకటిస్తామన్నారు. తాను అధికారంలోకి వస్తే ఒక్క ఇల్లు కూడా తీసుకోనని చెప్పిన వ్యక్తి, పక్కనున్న బంగ్లాలను కూల్చివేసి విలాసవంతమైన ‘శీష్ మహల్’ ఎలా నిర్మించుకున్నారో ప్రజలే స్వయంగా చూస్తారని కేజ్రీవాల్‌పై తీవ్రస్థాయిలో విమర్శలు గుప్పించారు. ఈ బంగ్లాలో రూ.కోట్ల విలువైన వియత్నాం మార్బుల్స్, ఖరీదైన కర్టెన్లు, స్మార్ట్ లైటింగ్ సిస్టమ్ వంటి సకల విలాసాలు ఉన్నాయని, ఇదొక అవినీతి చిహ్నమని ఆరోపించారు.

గత జులైలో ఈ భవనాన్ని విఐపీ అతిథుల గెస్ట్ హౌస్‌గా, సాంస్కృతిక కేంద్రంగా అభివృద్ధి చేయాలని, నిర్వహణ కోసం లగ్జరీ హాస్పిటాలిటీ ఆపరేటర్‌ను నియమించాలని ప్రభుత్వం భావించింది. అయితే ఇప్పుడు నేరుగా ప్రజల సందర్శనకే అనుమతినిస్తూ నిర్ణయం తీసుకుంది. 2015 నుంచి 2024 అక్టోబర్ వరకు కేజ్రీవాల్ కుటుంబం ఇక్కడే నివసించింది. 

ఈ నివాస పునరుద్ధరణకు ఏకంగా రూ.33.66 కోట్లు ఖర్చు చేశారని ‘కాగ్’ నివేదిక వెల్లడించింది. ఇది ప్రారంభ అంచనాల కంటే 340 శాతం ఎక్కువని, అందులో రూ.18.88 కోట్లు కేవలం విలాసవంతమైన, అలంకార వస్తువులకే వెచ్చించారని ఆరోపణలు వచ్చాయి. అలాగే విస్తీర్ణాన్ని కూడా 1,397 చదరపు మీటర్ల నుంచి 1,905 చదరపు మీటర్లకు పెంచారని గుర్తించారు. అయితే బీజేపీ చేస్తున్న ఈ ఆరోపణలన్నీ అవాస్తవాలని, సంఖ్యలను పెంచి చూపుతున్నారని ఆమ్ ఆద్మీ పార్టీ (ఆప్) కొట్టిపారేసింది.