టీమిండియా స్టార్ బ్యాటర్, టీ20 ప్రపంచకప్ విన్నింగ్ కెప్టెన్ సూర్యకుమార్ యాదవ్ ఒక 'వైట్ బాల్ గాడ్' అని, దేవుడిలా ఆడుతున్నాడని ముంబై సహచర ఆటగాడు సర్ఫరాజ్ ఖాన్ ప్రశంసల వర్షం కురిపించాడు. ప్రస్తుత ఫామ్‌తో సూర్య భారత జట్టులోకి కచ్చితంగా పునరాగమనం చేస్తాడని ధీమా వ్యక్తం చేశాడు. కోల్‌కతాలో నిన్న‌ సయ్యద్ ముస్తాక్ అలీ ట్రోఫీలో భాగంగా గుజరాత్‌తో జరిగిన మ్యాచ్ అనంతరం సర్ఫరాజ్ ఈ వ్యాఖ్యలు చేశాడు.

ఈ మ్యాచ్‌లో గుజరాత్ నిర్దేశించిన 198 పరుగుల లక్ష్యాన్ని ముంబై 26 బంతులు మిగిలి ఉండగానే ఛేదించింది. ఇందులో సూర్యకుమార్ యాదవ్ కేవలం 29 బంతుల్లో 9 ఫోర్లు, 7 సిక్సర్లతో 82 పరుగులు చేసి విధ్వంసం సృష్టించాడు. కేవలం 18 బంతుల్లోనే అతను హాఫ్ సెంచరీ పూర్తి చేయడం విశేషం.

ఈ ప్రదర్శనపై సర్ఫరాజ్ మాట్లాడుతూ.. "ప్రస్తుతం అతను వైట్ బాల్ క్రికెట్‌లో దేవుడిలా ఆడుతున్నాడు. అతను ఆడుతున్న షాట్లు మీరందరూ చూస్తున్నారు. మొన్న 15 బంతుల్లో హాఫ్ సెంచరీ చేస్తే, ఈరోజు 18 బంతుల్లోనే చేశాడు. అతని బ్యాటింగ్ చూస్తుంటే, క్రికెట్ ఆడుతున్నట్లు కాకుండా వీడియో గేమ్ ఆడుతున్నట్లు అనిపిస్తోంది. సూర్య మా జట్టులో ఉండటం మా అదృష్టం. అదే ప్రత్యర్థి జట్టులో ఉండుంటే మాకు చాలా టెన్షన్‌గా ఉండేది" అని తెలిపాడు.

టీ20 ప్రపంచకప్ టైటిల్ అందించిన మూడు నెలలకే సూర్యకుమార్‌ను కెప్టెన్సీ నుంచి తొలగించి, జట్టులో స్థానం లేకుండా చేసిన సంగతి తెలిసిందే. అతని స్థానంలో శ్రేయస్ అయ్యర్ కెప్టెన్ అయ్యాడు. "సూర్యకు పునరాగమనం చేయడం అస్సలు కష్టం కాదు. అతను కొన్ని షాట్లను మరింత మెరుగుపరుచుకున్నాడు. ముఖ్యంగా గ్రౌండ్‌కి స్ట్రెయిట్‌గా కొట్టే షాట్లు చాలా దూరం వెళుతున్నాయి. అతను గతంలో కంటే ఇప్పుడు మరింత ప్రమాదకర బ్యాటర్‌గా మారాడు" అని సర్ఫరాజ్ వివరించాడు.

అయితే, తామిద్దరం జట్టులోకి పునరాగమనం గురించి ఎప్పుడూ చర్చించుకోమని సర్ఫరాజ్ స్పష్టం చేశాడు. "మేము కలిసినప్పుడు క్రికెట్ గురించే మాట్లాడుకుంటాం. ఆటను ఎలా మెరుగుపరుచుకోవాలి, ఏ బౌలర్‌పై ఎలా పరుగులు చేయాలి అనే విషయాలు చర్చిస్తాం. సూర్య ఇచ్చే సలహాలు నాకు చాలా ఉపయోగపడతాయి" అని అన్నాడు.

ఇదే సమయంలో తన కెరీర్ గురించి మాట్లాడుతూ.. తాను 20 కిలోల బరువు తగ్గానని, ఈ సీజన్‌లో పరుగులు చేయడంతో పాటు ఫిట్‌నెస్‌ పరంగానూ సిద్ధంగా ఉన్నానని చెప్పాడు. "భవిష్యత్తులో ఏం జరుగుతుందో ఎవ‌రూ చెప్ప‌లేం. నేను పరుగులు చేయాలనుకున్నప్పుడు చేశాను, బరువు తగ్గాలనుకున్నప్పుడు తగ్గాను, ఫీల్డింగ్ మెరుగుపరుచుకున్నాను. టీమిండియా నుంచి పిలుపు ఎప్పుడు వచ్చినా వెళ్లడానికి సిద్ధంగా ఉన్నాను" అని సర్ఫరాజ్ తెలిపాడు.