భారత్ నుంచి అమెరికా వెళ్లే ప్రయాణికులకు ప్రముఖ విమానయాన సంస్థ ఎయిరిండియా తీపి కబురు అందించింది. ఢిల్లీ, ముంబై నగరాల నుంచి న్యూయార్క్‌కు నేరుగా నడిచే నాన్‌స్టాప్ విమాన సర్వీసులను సంస్థ అధికారికంగా పునరుద్ధరించింది. గగనతల ఆంక్షలు సడలించడంతో ఈ నిర్ణయం తీసుకున్నట్లు తెలిపింది. ఈ మార్పు వల్ల ప్రయాణికులకు సుమారు 5 గంటల వరకు ప్రయాణ సమయం ఆదా కానుంది.

గతంలో పశ్చిమాసియా పరిసరాల్లోని గగనతల ఆంక్షల కారణంగా ఎయిరిండియా విమానాలు సుదీర్ఘ మార్గంలో ప్రయాణించాల్సి వచ్చేది. మధ్యలో ఇంధనం నింపుకోవడానికి ఇటలీలోని రోమ్ నగరంలో టెక్నికల్ స్టాప్ తీసుకునేవి. దీంతో ప్రయాణానికి దాదాపు 22 గంటల సమయం పట్టేది. తాజాగా నేరుగా నాన్‌స్టాప్ సర్వీసులు ప్రారంభం కావడంతో, ప్రయాణ సమయం దాదాపు 17 గంటలకు తగ్గిపోయింది.

భారత విమానాలకు పాకిస్థాన్ తమ గగనతలాన్ని ఇంకా మూసివేసే ఉంచినప్పటికీ, ఇరాక్ గగనతలం తిరిగి అందుబాటులోకి రావడంతో తక్కువ సమయంలో ప్రయాణించే వీలు చిక్కింది. గతంలో ఇరాన్-అమెరికా ఉద్రిక్తతల కారణంగా పశ్చిమాసియాలోని కొన్ని ప్రాంతాల్లో విమానాల రాకపోకలపై తీవ్ర ఆంక్షలు విధించిన సంగతి తెలిసిందే.

విమానాల షెడ్యూల్ వివరాలు:
ఢిల్లీ - న్యూయార్క్ (JFK): ప్రతిరోజూ ఒక సర్వీసు
ముంబై - న్యూయార్క్ (JFK): ప్రతిరోజూ ఒక సర్వీసు
ఢిల్లీ - నెవార్క్ (EWR): వారానికి 4 సర్వీసులు
ముంబై - నెవార్క్ (EWR): వారానికి 3 సర్వీసులు

ఈ సుదీర్ఘ ప్రయాణాల కోసం ఎయిరిండియా అత్యాధునిక విమానాలను కేటాయించింది. ఢిల్లీ నుంచి రాకపోకలు సాగించే విమానాల్లో ‘ఎయిర్‌బస్ ఏ350-900’ను ఉపయోగిస్తున్నారు. ఇందులో పూర్తి ఫ్లాట్-బెడ్ సౌకర్యం కలిగిన 28 బిజినెస్ సూట్లు, 24 ప్రీమియం ఎకానమీ, 264 ఎకానమీ సీట్లు ఉన్నాయి. అలాగే ముంబై మార్గాల్లో ‘బోయింగ్ 777-300ఈఆర్’ విమానాలు నడుస్తున్నాయి. ఇందులో వ్యక్తిగత ప్రైవసీ డోర్లు ఉన్న 8 ఫస్ట్ క్లాస్ సూట్లు, 40 ఫ్లాట్-బెడ్ బిజినెస్ క్లాస్, 280 ఎకానమీ సీట్లు అందుబాటులో ఉన్నాయి.

నాన్‌స్టాప్ సర్వీసుల పునరుద్ధరణతో పాటు విమానాల్లో ఆధునిక క్యాబిన్ సదుపాయాలు కల్పించడం వల్ల భారత్-అమెరికా మధ్య రాకపోకలు సాగించే ప్రయాణికులకు మరింత మెరుగైన, సౌకర్యవంతమైన సేవలు అందుతాయని ఎయిరిండియా స్పష్టం చేసింది.