తమిళనాడులోని ప్రసిద్ధ తిరుచెందూర్ సుబ్రహ్మణ్య స్వామి ఆలయంలో నేడు (ఆదివారం) జరగనున్న శూరసంహారం కార్యక్రమానికి 4,100 మంది పోలీసులతో భారీ భద్రతా ఏర్పాట్లు చేశారు. వార్షిక కంద షష్ఠి ఉత్సవాల్లో ఇది అత్యంత ప్రధాన ఘట్టం. ఈ నేపథ్యంలో దేశవ్యాప్తంగా తరలివచ్చిన వేలాది మంది భక్తులతో ఆలయ పరిసరాలు కిక్కిరిసిపోయాయి.

మురుగన్ ఆరు పవిత్ర క్షేత్రాలలో (ఆరుపడై వీడు) రెండవదైన ఈ సముద్ర తీర ఆలయంలో, శూరపద్ముడనే రాక్షసుడిపై స్వామివారు సాధించిన విజయానికి గుర్తుగా 'శూరసంహారం' ఘట్టాన్ని వైభవంగా నిర్వహిస్తారు. ఇందులో భాగంగా, ఈరోజు సాయంత్రం 4 గంటలకు స్వామి జయంతినాథర్‌ను ఊరేగింపుగా సముద్ర తీరానికి తీసుకువస్తారు. ఈ అద్భుత ఘట్టాన్ని వీక్షించేందుకు దేశ, విదేశాల నుంచి భారీ సంఖ్యలో భక్తులు తరలివచ్చారు. నవంబర్ 10న యాగశాల పూజలతో ప్రారంభమైన ఈ ఉత్సవాల కోసం భక్తులు కఠిన ఉపవాస దీక్షలు చేపట్టి ఆలయ ప్రాంగణంలోనే బస చేస్తున్నారు.

భక్తుల రద్దీని దృష్టిలో ఉంచుకుని తూత్తుకుడి జిల్లా ఎస్పీ శివప్రసాద్ పర్యవేక్షణలో పటిష్ట భద్రతా చర్యలు చేపట్టారు. జన సమూహాన్ని నియంత్రించేందుకు బారికేడ్లు, వాచ్‌టవర్ల ద్వారా నిరంతర నిఘా ఏర్పాటు చేశారు. సముద్ర స్నానాల సమయంలో భక్తులు లోతైన ప్రాంతాలకు వెళ్లకుండా తీరంలో ఫ్లోటింగ్ బారియర్లను సైతం అమర్చారు. శూరసంహారం అనంతరం సంతృప్తి మండపంలో స్వామివారికి విశేష అలంకరణ, దీపారాధన నిర్వహిస్తారు. ఉత్సవాల్లో ఏడవ రోజైన సోమవారం రాత్రి స్వామి కుమరవిడంగ పెరుమాళ్, దేవనాయకి అమ్మవార్ల తిరుకల్యాణ మహోత్సవం జరగనుంది.