అరవింద్ కేజ్రీవాల్, ఆయన కుమార్తెకు లారెన్స్ బిష్ణోయ్ గ్యాంగ్ పేరుతో బెదిరింపులు

ఢిల్లీ మాజీ ముఖ్యమంత్రి, ఆమ్ ఆద్మీ పార్టీ అధినేత అరవింద్ కేజ్రీవాల్‌తో పాటు ఆయన కుమార్తె హర్షిత కేజ్రీవాల్‌కు ప్రాణహాని బెదిరింపులు వచ్చాయి. గ్యాంగ్‌స్టర్ లారెన్స్ బిష్ణోయ్ ముఠా పేరుతో గుర్తుతెలియని వ్యక్తులు ఈ బెదిరింపులకు పాల్పడ్డారు. తమకు రూ.7 కోట్లు ఇవ్వాలని, లేనిపక్షంలో కేజ్రీవాల్‌తో పాటు ఆయన కుమార్తెను హతమారుస్తామని హెచ్చరించారు.

ఈ విషయాన్ని ఢిల్లీలోని తిలక్ నగర్ ఆప్ ఎమ్మెల్యే జర్నైల్ సింగ్ వెల్లడించారు. తన ఫోన్‌కు గుర్తుతెలియని వ్యక్తి నుంచి కాల్, వాట్సాప్ సందేశాలు వచ్చినట్లు ఆయన తెలిపారు. విదేశాల్లో సంబంధాలు ఉన్న లారెన్స్ బిష్ణోయ్ గ్యాంగ్ సభ్యుడినంటూ పరిచయం చేసుకున్న సదరు వ్యక్తి, భారీ మొత్తంలో డబ్బు డిమాండ్ చేస్తూ బెదిరించినట్లు పేర్కొన్నారు.

ఈ వ్యవహారంపై ఎమ్మెల్యే జర్నైల్ సింగ్ పంజాబ్‌లోని మోహాలీ పోలీసులకు నవంబర్ 6న లిఖితపూర్వకంగా ఫిర్యాదు చేశారు. దీంతో మోహాలీ పోలీసులు భారతీయ న్యాయ సంహిత (బీఎన్ఎస్), ఇన్ఫర్మేషన్ టెక్నాలజీ (ఐటీ) చట్టంలోని సంబంధిత సెక్షన్ల కింద కేసు నమోదు చేశారు. ఈ కేసు దర్యాప్తు బాధ్యతలను మొహాలీ సైబర్ క్రైమ్ యూనిట్ ఇన్‌స్పెక్టర్ సునీల్ కుమార్‌కు అప్పగించారు.

బెదిరింపులకు ఉపయోగించిన మొబైల్ నంబర్ కాల్ డేటా రికార్డులు (సీడీఆర్), ఇంటర్నెట్ ప్రొటోకాల్ (ఐపీ) లాగ్‌లు, లొకేషన్ సమాచారాన్ని పోలీసులు క్షుణ్ణంగా విశ్లేషిస్తున్నారు. ఈ ముఠా నిజంగానే బిష్ణోయ్ నెట్‌వర్క్‌కు చెందినదా? లేదా కేవలం వారి పేరును వాడుకున్నారా? అనే కోణంలో ఆరా తీస్తున్నారు. మరోవైపు, ఈ బెదిరింపుల నేపథ్యంలో కేజ్రీవాల్, ఆయన కుటుంబ సభ్యులకు పూర్తిస్థాయి భద్రత కల్పించాలని ఎమ్మెల్యే జర్నైల్ సింగ్ పోలీసులను కోరారు.