బాలీవుడ్ స్టార్ హీరో రణ్‌వీర్ సింగ్ కుటుంబంలో తీవ్ర విషాదం చోటుచేసుకుంది. ఆయన తాత (తల్లి వైపు తాత) డాక్టర్ రామ్ హింగోరానీ (96) వయోభారంతో కన్నుమూశారు. దీపావళి పర్వదినం సందర్భంగా నిర్వహించిన లక్ష్మీ పూజ సమయంలోనే ఆయన ప్రశాంతంగా తుదిశ్వాస విడిచారు. ఈ విషాద వార్తను రామ్ హింగోరానీ మనుమరాలు, రణ్‌వీర్ సింగ్ కజిన్ సౌమ్య హింగోరానీ ఇన్‌స్టాగ్రామ్ వేదికగా వెల్లడించారు.

సౌమ్య తన సోషల్ మీడియా పోస్ట్‌లో తాతయ్యతో ఉన్న అనుబంధాన్ని గుర్తుచేసుకుంటూ భావోద్వేగానికి లోనయ్యారు. "96 ఏళ్ల నిండు జీవితాన్ని ఆయన గడిపారు. ఇది బాధపడాల్సిన సమయం కాదు, ఆయన అద్భుతమైన జీవన ప్రయాణాన్ని స్మరించుకోవాల్సిన తరుణం. దీపావళి రోజున, అత్యంత పవిత్రమైన లక్ష్మీ పూజ సమయంలో ఆయన మా నానమ్మ చెంతకు వెళ్లిపోయారు. ప్రపంచంలోనే అత్యుత్తమ తాతయ్యగా ఉన్నందుకు కృతజ్ఞతలు" అంటూ ఆమె నివాళులర్పించారు.

గతంలో రణ్‌వీర్ సింగ్ తన తాతయ్యతో కలిసి ‘రాకీ ఔర్ రాణీ కీ ప్రేమ్ కహానీ’ చిత్రంలోని ‘వాట్ ఝుమ్కా?’ పాటకు ఉత్సాహంగా డ్యాన్స్ చేసిన వీడియో అప్పట్లో నెట్టింట విశేషంగా ఆకట్టుకుంది. ఆయనతో రణ్‌వీర్‌కు ఎంతో ప్రత్యేక అనుబంధం ఉండేది. డాక్టర్ రామ్ హింగోరానీ మరణవార్త తెలియడంతో బాలీవుడ్ ప్రముఖులు, నెటిజన్లు, అభిమానులు రణ్‌వీర్ కుటుంబానికి సోషల్ మీడియా వేదికగా తమ ప్రగాఢ సానుభూతిని తెలియజేస్తున్నారు.