వయసు కేవలం ఒక సంఖ్య మాత్రమేనని నిరూపిస్తూ, 61 ఏళ్ల కెనడియన్ మహిళ అసాధారణమైన ప్రపంచ రికార్డును నెలకొల్పారు. హంట్స్‌మన్ వరల్డ్ సీనియర్ గేమ్స్‌లో భాగంగా జరిగిన ఈవెంట్‌లో, ఆమె ఏకధాటిగా ఐదు గంటల పాటు అబ్డామినల్ ప్లాంక్ పొజిషన్‌లో ఉండి గిన్నిస్ బుక్ ఆఫ్ వరల్డ్ రికార్డ్స్‌లో తన పేరును లిఖించుకున్నారు. ఈ ఫీట్‌తో ఆమె ప్రపంచవ్యాప్తంగా ప్రశంసలు అందుకుంటున్నారు.

డోనాజీన్ వైల్డ్ అనే ఈ 61 ఏళ్ల మహిళ, మంగళవారం జరిగిన ఈ పోటీలో ఈ అద్భుతమైన ఫీట్‌ను సాధించారు. విశేషమేమిటంటే.. ఆమె తన రికార్డును తానే బద్దలుకొట్టారు. ఈ ఏడాది మార్చిలో అల్బెర్టాలో 4 గంటల 30 నిమిషాల 11 సెకన్ల పాటు ప్లాంక్‌లో ఉండి ఆమె రికార్డు సృష్టించారు. ఇప్పుడు ఆ రికార్డును అధిగమించి ఐదు గంటల మార్కును చేరుకున్నారు. 

స్టేజ్‌పై ఆమె ఏకాగ్రతతో ప్లాంక్ చేస్తుండగా, 5 గంటల సమయం పూర్తికాగానే ప్రేక్షకులు పెద్ద ఎత్తున చప్పట్లతో ఆమెను అభినందించారు. అనంతరం డోనాజీన్ చిరునవ్వుతో తన విజయాన్ని ఆస్వాదించారు. ఈ అపురూప దృశ్యానికి సంబంధించిన వీడియో ఇప్పుడు సోషల్ మీడియాలో వైరల్‌గా మారింది.

డోనాజీన్ వైల్డ్ రిటైర్డ్‌ మాజీ టీచర్. ఆమెకు ఐదుగురు పిల్లలు, మనవరాళ్లు కూడా ఉన్నారు. గత పదేళ్లకు పైగా ఆమె ప్లాంకింగ్ ప్రాక్టీస్ చేస్తున్నారు. తన శారీరక ధారుడ్యం వెనుక కఠోర శ్రమ ఉందని, రోజూ ప్లాంకింగ్‌తో పాటు పుష్-అప్స్, వెయిట్‌లిఫ్టింగ్, రన్నింగ్ వంటివి తన శిక్షణలో భాగమని ఆమె తెలిపారు. 

ఈ రికార్డు ప్రయత్నం గురించి ఆమె నెలల ముందే నిర్వాహకులకు సమాచారం ఇచ్చారు. ఈవెంట్ ప్రారంభోత్సవంలో భాగంగా ఈ రికార్డు ప్రయత్నాన్ని చేపట్టారు. 61 ఏళ్ల వయసులో ఆమె ప్రదర్శించిన శారీరక ధారుడ్యానికి, పట్టుదలకు నెటిజన్లు ఆశ్చర్యం వ్యక్తం చేస్తూ ప్రశంసలు కురిపిస్తున్నారు. స్థిరమైన శిక్షణ, సంకల్పం ఉంటే వయసుతో సంబంధం లేకుండా ఏదైనా సాధించవచ్చని డోనాజీన్ నిరూపించారు.